Qańtardaǵy UBT bastaldy
ASTANA. KAZINFORM – Búgin qańtar aıynda ótetin Ulttyq biryńǵaı testileý (UBT) bastaldy. Ol 10 aqpanǵa deıin jalǵasady, dep habarlaıdy Ǵylym jáne joǵary bilim mınıstrligi.
Bıyl UBT-ǵa 187 myńǵa jýyq adam qatysýǵa ótinish bergen. Bul ótken jylmen salystyrǵanda 20 myńǵa kóp. Testileýge tirkelgen talapkerlerdiń 75,2%-y qazaq tilinde, 24,6%-y orys tilinde, al 189 adam aǵylshyn tilinde tapsyrýdy tańdaǵan.
Mınıstrlik málimetinshe, talapkerler ótinish berý barysynda testileý kúnin, ýaqytyn jáne pýnktin ózderi tańdaǵan.
Eń kóp tańdalǵan beıindik pánder kombınatsııasy – «Matematıka-fızıka». Bul baǵytty talapkerlerdiń 19,2%-y tańdaǵan. Atalǵan kombınatsııa bolashaq muǵalimder, ınjenerler, mehanıkter, tehnıkter men tehnologtar, energetıkter men qurylysshylardy daıarlaýǵa baǵyttalǵan.
Al 16,9% talapker «Bıologııa-hımııa», 9,7% talapker «Shyǵarmashylyq emtıhan» pánderin tańdaǵan. Bul sáıkesinshe medıtsınalyq jáne shyǵarmashylyq sala mamandyqtaryna túsýge nıetti talapkerler.
UBT barysynda kalkýlıator, Hımııalyq elementterdiń perıodtyq júıesi (Mendeleev kestesi) jáne tuzdardyń erigishtik kestesi testileý baǵdarlamasynda qoljetimdi bolady. Testileý aıaqtalǵannan keıin talapkerler 30 mınýt ishinde apellıatsııaǵa ótinish bere alady. Apellıatsııaǵa ótinish bergen talapkerlerdiń sertıfıkaty apellıatsııalyq komıssııa sheshiminen keıin jeke kabınetinde jarııalanady.
2026 jyly Ulttyq biryńǵaı testileýdiń formaty ózgerissiz qalady. Talapkerler úsh mindetti pán men eki beıindik pándi tapsyrady.
UBT tapsyrmalarynyń jalpy sany – 120. Onyń ishinde «Qazaqstan tarıhy» páni boıynsha 20 tapsyrma, «Oqý saýattylyǵy» men «Matematıkalyq saýattylyq» pánderinen 10 tapsyrmadan, sondaı-aq eki beıindik pánniń árqaısysynan 40 tapsyrmadan beriledi.
Eń joǵary ball – 140.
Testileý ýaqyty 4 saǵatty (240 mınýt) quraıdy. Erekshe bilim berý qajettilikteri bar talapkerler úshin qosymsha 40 mınýt ýaqyt qarastyrylǵan.
Aıta keteıik, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵandar, shyǵarmashylyq bilim berý baǵdarlamalarynan basqa daıyndyq baǵyttaryna nemese pedagogıkalyq baǵytqa aqyly negizde aýysqysy keletinder, ótken jylǵy mektep pen kolledj túlekteri, QR azamaty bolyp tabylmaıtyn ulty qazaq tulǵalar, shetelde bilim alǵan QR azamattary, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.
Buǵan deıin UBT-ǵa qatysý úshin qandaı qujat kerek ekenin jazǵan bolatynbyz.