Qańtardaǵy UBT: Almatyda 19 oqýshy smartfon men shpargalka alyp kirgen
ALMATY. KAZINFORM – Almatyda UBT-ǵa smartfon, shpargalka alyp kirgen talapkerler test tapsyrý múmkindiginen aıyryldy. Bul týraly QR Ǵylym jáne joǵary bilim mınıstrliginiń Ulttyq testileý ortalyǵy dırektorynyń orynbasary Naýjan Dıdarbekova aıtty.
«UBT ótkizý barysynda 27 ereje buzýshylyq anyqtaldy. Onyń ishinde 19 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 8 adam shyǵarylyp, olardyń nátıjeleri joıyldy», - dedi ol.
Aıtýynsha, talapkerler testileý aıaqtalǵannan keıin 30 mınýt ishinde apellıatsııaǵa bere aldy. Sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi bolady.
«2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziletin bolady. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady», - dep eskertti N. Dıdarbekova.
