Qańtardaǵy UBT: 142 talapkerdiń baly joıyldy

ASTANA. KAZINFORM – Qańtar aıyndaǵy UBT-nyń úsh aptasynda 126 myńǵa jýyq adam test tapsyrdy. Tolyq nátıjesin Ulttyq biryńǵaı testileý ortalyǵy jarııalady. 

Talapkerlerdiń 72%-ǵa jýyǵy shekti baldy jınady. Testileý nátıjesi boıynsha ortasha ball -  67. Eń joǵary baldy (138 ball) Shymkent qalasynyń oqýshysy jınady jáne 150 talapker 130 baldan joǵary ball jınady.

Testke qatysýshylardyń 78,7%-y qazaq tilinde, 21,2%-y orys tilinde, 62 adam aǵylshyn tilinde testileýden ótti.

Talapkerlerdiń basym bóligi, 17,8%-y «Bıologııa-Hımııa» pánder kombınatsııasyn tapsyrdy. 17,2%-y «Matematıka-Fızıka» jáne 10,4%-y «Matematıka-Informatıka» kombınatsııasyn tańdaǵan. Eń az tańdalǵan kombınatsııa – «Hımııa-Fızıka», ony 149 talapker tańdaǵan. 

Qańtardaǵy UBT-ǵa erekshe qajettiligi bar 295 talapker qatysqan. 

- Talapkerler testileý aıaqtalǵannan keıin 30 mınýt ishinde apellıatsııaǵa bere alady, bul jaǵdaıda sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi. Qazirgi kezde 142 adamnyń nátıjesi joıyldy. Onyń ishinde 89 talapker smartfon jáne shpargalka sııaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, al testileý kezinde erejelerdi buzǵany úshin aýdıtorııadan 53 adam shyǵaryldy. Ózge tulǵalar anyqtalǵan joq, - deıdi ulttyq ortalyqtan. 

Sondaı-aq 2025 jylǵy UBT aıaqtalǵannan keıin, ıaǵnı 31 qazanǵa deıin testileýdiń beınejazbalaryna taldaý júrgiziletini eskerildi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.

Aıta keteıik, bıylǵy ulttyq biryńǵaı testileý 13 qańtarda bastaldy, 10 aqpanǵa deıin jalǵasady. Testileýge qatysýǵa 167 myńǵa jýyq talapker nıet bildirdi.