Qańtarda zardap shekken kásipkerlerge salyq jeńildigi qarastyrylady

NUR-SULTAN. QazAqparat – Májilistiń jalpy otyrysynda Ulttyq ekonomıka mınıstri Álibek Qýantyrov qańtardaǵy tártipsizdikter kezinde zardap shekken kásipkerlerge qoldaý kórsetý sharalaryn túsindirdi, dep habarlaıdy QazAqparat tilshisi.

«Memleket basshysy qańtar aıyndaǵy oqıǵalar barysynda keltirilgen zalaldy óteý, bızneske járdem kórsetý týraly tapsyrma berdi. Atalǵan jumys barysynda salyq salý máseleleri de bar. Sondyqtan alynǵan ótemaqy somasy boıynsha kásipkerlerdi salyq mindettemesinen bosatý maqsatynda osy máseleni retteý normalary usynylady», - dedi Á.Qýantyrov.

Sonymen qatar ol ınternet salasyndaǵy salyq salý júıesine qatysty usynysyn aıtty.

«Internetpen qamtamasyz etý úshin jańa tehnologııalar kóbirek qoldanylyp jatyr. Sonyń biri – geostatsıonarlyq emes spýtnıktik baılanys júıeleri. Salyq kodeksinde osyndaı baılanys túri úshin 1 aılyq eseptik kórsetkish mólsherinde tólem belgileý usynylady», - dedi mınıstr.

Budan buryn habarlanǵandaı, Májilistiń osy jalpy otyrysynda Salyq kodeksine ózgerister engizý jónindegi qujatty qaraý kezinde elimizde paıdaly qazbalardy óndirý salyǵynyń kólemi artatyny aıtyldy.

Sonymen qatar tsıfrlyq maınıngke salyq júktemesi kúsheıtilmek.