Qańtarda táýelsizdigimizdiń ornyn sıpap qalardaı syn saǵat týdy - Ulytaýlyqtar

NUR-SULTAN. QazAqparat – «Siz qandaı qıyndyq bolsa da ózińizdi halyqpen birge bolatyn memleket basshysy retinde kórsettińiz». «Kazakhmys Holding» JShS eńbekkerleri men Ulytaý-Jezqazǵan aımaǵynyń halqynyń atynan 11 myńnan astam adamnyń qoly qoıylyp joldanǵan hatta osyndaı joldar bar, dep habarlaıdy QazAqparat tilshisi.

Aıta keteıik, bul hat Prezıdent Qasym-Jomart Toqaevtyń «Jańa Qazaqstan: Jańarý men jańǵyrý joly» atty bıylǵy Joldaýyna oraı jazylǵan.

Joldaýda Memleket basshysynyń Jezqazǵan óńirin Qaraǵandy oblysynyń quramynan shyǵaryp, Ulytaý atty oblys qurýdy tapsyrǵany barshaǵa málim.

Hat avtorlary osy sheshimge rızashylyǵyn bildirgen.

«Búgin kıeli Ulytaý-Jezqazǵan aımaǵynyń jurty orny aıryqsha qýanyshqa kenelip otyr. Qala-aýdan mekemeleri men mádenı oryndaryna kópshilik jınalyp, Joldaýyńyzdy tyńdady. Keshe ǵana bultsyz kúni kúrkiregen kúndeı bop, el ishin dúrbeleńge salǵan, beıbit sherýdi bereke qashyrǵan qandy oqıǵaǵa aınaldyrǵan lańkesterdiń qastandyǵy men onyń sabaqtary jaıly aıtqan oılaryńyz bizdi erekshe tolǵandyrdy», -dep jazady hat ıeleri.

Sondaı-aq, hat avtorlary qańtar kezindegi syn saǵatta Prezıdenttiń halyqpen birge bolǵanyna aıryqsha toqtalǵan.

«Ózińiz aıtqandaı, sol kúnderde otyz jyldyq tarıhy bar táýelsizdigimizdiń ornyn sıpap qalardaı syn saǵat týdy. «Qańtardyń qandy oqıǵasy» atanǵan sol dúrbeleńdi basýda siz tabandylyq, qaısarlyq, sheshimdi qımyl tanyttyńyz. Qandaı qıyndyq bolsa da, ózińizdi halyqpen birge bolatyn Memleket basshysy retinde kórsettińiz. Osy adaldyǵyńyz ben ar aldyndaǵy ustanymyńyz úshin biz sizdi erekshe qurmetteımiz», - delingen hat mátininde.