Qańtarda shyǵynǵa ushyraǵan Almaty oblysynyń kásipkerlerine 100 mıllıon teńge óteldi

QONAEV. QazAqparat – Qańtar oqıǵasy kezinde Almaty oblysynda shyǵynǵa ushyraǵan kásipkerlerge 100 mıllıon teńge óteldi, dep habarlaıdy QazAqparat tilshisi.

Qańtardaǵy tártipsizdikterden zardap shekken kásipkerler 100 mln teńge kóleminde materıaldyq zalaldyń ornyn toltyra almaı júrgen. Osynyń aıasynda olar shaǵyn jáne orta kásipkerlik sýbektilerine keltirilgen múliktik zııandy anyqtaý jónindegi óńirlik komıssııaǵa júginip, nátıjesinde ótinimderi qabyldandy.

Sybaılas jemqorlyqqa qarsy qyzmet jáne óńirlik kásipkerler palatasynyń aralasýymen múddeli tarappen kezdesý uıymdastyrylǵan.

«Shaǵyn jáne orta bıznestiń kásipkerleri Almaty oblysynyń Sybaılas jemqorlyqqa qarsy qyzmet departamentine jáne «Atameken» óńirlik kásipkerler palatasyna ákimshilik kedergiler boıynsha shaǵym túsirdi. Kesdesý nátıjesi boıynsha kásipkerlerge qańtardaǵy shyǵyn tolyqtaı óteldi. Kásipkerlerdiń zańdy quqyqtary qorǵaldy»,- delingen Almaty oblysynyń Sybaılas jemqorlyqqa qarsy is-qımyl departamentiniń baspasóz qyzmetiniń habarlamasynda.