Qańtarda Shardara sý qoımasyna 2,6 mlrd tekshe metr sý keldi
ASTANA. KAZINFORM – Qańtar aıynda Syrdarııa ózeni arqyly Shardara sý qoımasyna 2,6 mlrd tekshe metr sý keldi. Bul bastapqy boljamnan 100 mln tekshe metrge artyq. Bul týraly Sý resýrstary jáne ırrıgatsııa mınıstrligi málimdedi.
Sý resýrstary jáne ırrıgatsııa mınıstri Nurjan Nurjigitov Túrkistan oblysynyń turǵyndarymen kezdesip, óńirdegi iri sý sharýashylyǵy nysandaryn aralady. Nurjan Nurjigitov Maqtaaral aýdanynyń Myrzakent kentinde oblys turǵyndarymen kezdesý ótkizdi. Mınıstr aımaqty qajet sý kólemimen tolyq qamtamasyz etý boıynsha atqarylǵan jumystar týraly baıandady.
– Byltyr biz kórshi eldermen belsendi kelissóz júrgizdik, osynyń nátıjesinde elimizdiń ońtústigindegi sharýalardy sýarmaly sýmen tolyq qamtamasyz ettik. Biz «Qazsýshar» mekemesiniń jergilikti dıhandarmen jasaǵan kelisimsharttarynyń qanshalyqty oryndalǵanyn muqııat tekseremiz. Atap aıtqanda, kelisimshartsyz sý berý arqyly zań buzýshylyq faktileri bar-joǵyn anyqtaımyz. Osyǵan deıin oblysqa mınıstrliktiń Іshki aýdıt departamentiniń ókilderi kelgen bolatyn. Dúısenbiden bastap bizdiń mamandardan jasaqtalǵan taǵy bir jumys toby tekseris bastaıdy, - dedi Sý resýrstary jáne ırrıgatsııa mınıstri Nurjan Nurjigitov.
Túrkistan oblysynyń turǵyndary mınıstrge ırrıgatsııa jáne drenaj júıelerin rekonstrýktsııalaý, jekelegen gıdrotehnıkalyq qurylystardyń jaı-kúıi, sýarmaly sýdy bólý, sý berý jónindegi kelisimshart jasaý, jańa sý qoımalaryn salý, bilikti mamandardy daıarlaý jáne sharýalarǵa sýbsıdııa berý jóninde suraqtaryn qoıdy.
Azamattarmen kezdesýden keıin Nurjan Nurjigitov Shardara sý qoımasynyń jaı-kúıi men 2023 jyly rekonstrýktsııadan ótken bógetiniń jumysyn tekserdi.