Qańtarda Senat depýtattary saılaýshylardyń janynda bolady
ASTANA. QazAparat - Senat 2016 jyldy palata qyzmetiniń barlyq baǵyttary boıynsha jaqsy nátıjelermen aıaqtap otyr.
Búgin QR Parlamenti Senatynyń Tóraǵasy Qasym-Jomart Toqaev palata depýtattaryna osyndaı baǵa berdi, dep habarlaıdy QazAqparat.
Sanaýly kúnderden keıin elimizdiń qoǵamdyq-saıası ómirinde erekshe oryn alǵan mejeli kezeń -2016 jyl da tarıh qoınaýyna shyǵaryp salynatynyna toqtalǵan ol, bul Qazaqstan halqynyń Táýelsizdikti nyǵaıtý jolyndaǵy ólsheýsiz eńbeginiń shırek ǵasyrlyq belesin qoryndylaǵan mereıli jyl bolǵanyn jetkizdi.
Onyń paıymynsha, bıylǵy mereıli jyl ishinde Parlamentte asa mańyzdy jumystar atqaryldy. Jyl basynan altynshy shaqyrylǵan Parlamenttiń birinshi sessııasyna deıin Senat Parlament fýnktsııasyn atqarǵan kezeńde Úkimetpen tyǵyz baılanysta bola otyryp, 57 zańdy ýaqytyly qabyldap, óziniń Konstıtýtsııalyq ókilettigin abyroımen atqardy.
«Senatta halyqty tolǵandyryp júrgen ózekti taqyryptarǵa arnalǵan birqatar mańyzdy is-sharalar tabysty ótkizildi. Eýrazııalyq ekonomıkalyq odaq pen Dúnıejúzilik saýda uıymy jaǵdaıynda otandyq agrarlyq sektordyń básekege qabilettiligin arttyrý, jol qozǵalysy salasyn quqyqtyq retteý jáne elimizdegi bıologııalyq alýan túrliliktiń saqtalýyn zańnamalyq qamtamasyz etý máselelerine arnalǵan parlamenttik tyńdaýlarda qoǵamda oryn alyp otyrǵan ótkir máseleler talqylanyp, osy baǵyttardaǵy jumysty jandandyrý boıynsha tıisti memlekettik organdarǵa naqty nusqaýlar berildi. Jyl boıy palatanyń zań shyǵarmashylyǵymen qatar, elimizdiń syrtqy saıası bastamalaryn qoldaý sheńberinde shet memleketterdiń parlamentterinen yntymaqtastyqty tereńdetýge erekshe mán berildi»,-dep toqtaldy Toqaev.
Onyń sózine qaraǵanda, 2017 jyldyń basynda, ıaǵnı 4-13 qańtar aralyǵynda depýtattardyń óńirlerge saparlary josparlanyp otyr. Ótkiziletin kezdesýler barysynda Parlament qabyldaǵan zańdardy halyqqa jan-jaqty nasıhattaý jumysyn júrgizýi qajet.
