Qańtarda otbasynda janjal shyǵarǵysh 2 700 adam qamaýǵa alyndy

ASTANA. KAZINFORM — Osy jyldyń qańtar aıynda otbasynda janjal shyǵarǵan 10 myń adam ákimshilik jaýapkershilikke tartyldy.

Bul týraly Іshki ister mınıstrligi Ákimshilik polıtsııa komıtetiniń Otbasylyq turmystyq zorlyq-zombylyqqa qarsy kúres jónindegi basqarma bastyǵy, polıtsııa podpolkovnıgi Aqmaral Serikbaeva aıtty.

— Bıyl qańtar aıynda 10 myń deboshır ákimshilik jaýapkershilikke tartyldy. Onyń ishinde 2 700-i qamaýǵa alyndy. Bul ótken jyldyń kórsetkishinen 25 paıyzǵa joǵary. Turmystyq zorlyq-zombylyq qurbandaryn qorǵaý maqsatynda polıtsııa qyzmetkerleri 10 myńǵa jýyq qorǵaý nusqamasyn shyǵardy. Polıtsııanyń ótinishi boıynsha sottar quqyq buzýshylardyń minez-qulqyna 2 400 erekshe talap belgiledi. Olardyń jartysynan kóbi quqyq buzýshylarǵa alkogoldik ishimdikterdi tutynýǵa tyıym salynǵan, — dedi ol Ortalyq kommýnıkatsııalar qyzmetindegi brıfıngte.

Sonymen qatar onyń atap ótýinshe, 51 quqyq buzýshy turǵyn úıinen ýaqytsha shyǵaryldy. Olarǵa áleýmettik beıimdelý ortalyqtarynda óz is-áreketteri úshin oılaný, ıaǵnı osy ýaqyt aralyǵanda aqylǵa kelý usynylady nemese zań normalaryna sáıkes otbasyn qoldaý ortalyqtarynda olarmen psıhologtar jumys isteıdi.

— 48 deboshırge qatysty sottar densaýlyq saqtaý organdarynda mindetti psıhologııalyq kómek alýdy taǵaıyndady. Barlyǵynda baqylaý isteri júrgizilip, polıtsııanyń kúsheıtilgen baqylaýy belgilendi. Olardyń tarapynan belgilengen shekteýlerdi buzýdyń 2 300 faktisiniń joly kesildi, — dedi Aqmaral Serikbaeva.

Buǵan deıin elimizde jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsetindigin habarlaǵan edik.