Qańtarda oblıgatsııalyq zaemdardy tartý arqyly 1 mıllıon tonna astyq satyp alynady - S.Qulambaev
ASTANA. Jeltoqsannyń 25-i. QazAqparat /Marlan Jıembaı/ - Astyq satyp alý barysynda usaq aýyl sharýashylyǵy taýarlaryn óndirýshilerge birinshi kezekte basymdyq beriledi. Bul jaıynda juma kúni «Azyq-túlik kelisim-shart korporatsııasy» AQ-da ótken selektorlyq keńeste atalǵan mekemeniń basqarma tóraǵasynyń orynbasary Serik Qulambaev málim etti.
Onyń aıtýynsha, bul astyqtyń sońǵy satyp alynýy emes, qańtar aıynda oblıgatsııalyq zaemdardy tartý arqyly taǵy da 1 mıllıon tonna astyq alynatyn bolady.
«Astyq qabyldanatyn beketterde shaǵyn aýyl sharýashylyǵy taýarlaryn óndirýshilerdiń ónimderi tolyǵymen qabyldanyp boldy. Elevatorlarǵa jınaǵan astyqtaryn jetkizýge sheshim qabyldamaǵan kásiporyndardyń astyqtary ǵana qaldy. Tek bizdiń korporatsııanyń satyp alý kólemin ulǵaıtyp, astyqty satyp alatyndyǵyna senbegender qalyp otyr», dedi óz sózinde basqarma tóraǵasynyń orynbasary.
S.Qulambaevtyń sózine qaraǵanda, qazirgi ýaqytta barlyq shaǵyn aýyl sharýashylyǵy taýarlaryn óndirýshilerdiń ótinishi qanaǵattandyrylǵan. Sonymen qatar aldaǵy ýaqytta olardyń astyqtary elevatorǵa túsken jaǵdaıda birinshi kezekte qabyldanatyn bolady.
