Qańtarda nuqsan kelgen ǵımarattarǵa 31 mlrd teńge bólindi
«Orasan nuqsan kelgen nysandardyń biri – Almatydaǵy Prezıdent rezıdentsııasy, ózderińiz biletindeı, bul nysandy qalpyna keltirmeı, buzý týraly sheshim qabyldandy. Qalǵan 41 nysan úshin 31 mlrd 100 mıllıon teńge bólindi. 37 nysan qalpyna keltirildi. Bıylǵy qańtar aıynda Jetisý oblysy ákiminiń ǵımaratyn qalpyna keltirý aıaqtalady, naýryz aıynda Almaty qalasy Bas prokýratýrasynyń Quqyqtyq statıstıka jáne aqparat ortalyǵynyń ǵımaraty men Almaty qalasy ákiminiń ǵımaraty qalpyna keledi. Ony rekonstrýktsııalaý bıyl ekinshi toqsanda aıaqtalady», - dep jaýap berdi R. Sklıar depýtat saýalyna.
Almaty qalasyndaǵy Teleradıokeshen ǵımaratyn da jóndeýden ótkizý múmkin emes. Sondyqtan, ǵımarat qaıta salynyp, jyl sońyna deıin aıaqtalady. Oǵan qosymsha memlekettik saraptama arqyly naqtylanǵan qarajat bólinedi.
«Qazir memlekettik saraptama ótip jatyr. Kommertsııalyq nysandarǵa kelsek, jalpy 356 kommertsııalyq nysan zardap shekti. Qazir olardyń barlyǵy qalpyna keltirildi. 1789 kásipkerlik sýbektisi zalaldy tikeleı óteýge ótinim berdi, barlyq shaǵyn jáne orta bıznes obektileri boıynsha 16 mıllıard 700 mıllıon teńge óteldi», - dedi R. Sklıar.
Buǵan deıin QR Bas prokýrory Berik Asylov bir kúnde 8 oblystyń ákimdigine shabýyl jasalǵanyn aıtqan edi. Tártipsizdikke qatysýshylar muny bıliktiń sımvoly retinde basyp alǵylary kelgen.
