Qańtarda kúnniń sýytatynyna baılanysty IJTM-de tótenshe jaǵdaıǵa daıyndyq máseleleri talqylandy

Otyrysqa Munaı jáne gaz, Tótenshe jaǵdaılar, Kólik jáne kommýnıkatsııa mınıstrlikteriniń, «KEGOC», «Qazaqstan temir joly» jáne «Samuryq Energo» AQ ókilderi qatysty. Atalmysh jıynda eldegi energetıkalyq kásiporyndardyń 2013-2014 jyldardaǵy jylytý maýsymyna daıyndyǵy taǵy bir pysyqtalǵan bolatyn.
«Jalpy, Qazaqstannyń Biryńǵaı energetıkalyq júıesi turaqty jumys istep tur», - dep habarlaıdy mınıstrliktiń baspasóz qyzmeti. «Qazirgi ýaqytta eń kóp energetıkalyq aýyrtpalyqtyń deńgeıi josparlanǵan energetıkalyq aýyrtpalyqtyń 90 paıyzyna teń bolyp otyr. Bul barlyq energojúıeniń joǵary kerneýlik rejimge aýysqandyǵyn bildiredi», - delinedi málimette.
Sondaı-aq óńirlerdiń tótenshe jaǵdaıǵa daıyndyq máseleleri qaraldy. Aýa raıy boljamy málimetteri boıynsha, 2014 jylǵy qańtar aıynyń ortasynda jáne úshinshi onkúndiginde kún 40°S -ge deıin sýytady.
Quzyrly organdardyń otyrysy barysynda Semeı qalasyndaǵy «Jylýkommýnenergo» MKK-niń JES-1 stansasynda kómir qorynyń jetkiliksiz ekendigi atalyp ótti. Onyń mólsheri ereje boıynsha 20 táýlikke qalýy tıis, al Semeı qazandyǵynda kómirdiń jalpy qorynan qalatyn qaldyq 17 táýlikti quraıdy. Kentaý qalasyndaǵy kómir qory tipti 13 táýlikke ǵana artyq.
Sonymen qatar aýa raıynyń qatty tómendeýi kezinde Óskemen, Qaraǵandy, Semeı, Astana, Kókshetaý, Taraz, Qyzylorda, Kentaý, Shymkent qalalarynyń jylý júıelerindegi temperatýralyq rejim tıisti deńgeıde saqtalmaıtyndyǵy anyqtalyp otyr.
«Qazaqstandaǵy energonysandarda 5,5 mln. tonna kómir, 192 myń tonna mazýt jınaqtalǵan. Bul Úkimet bekitken mólsherge saı bolyp tabylady», - dep atap otyr komıtet.
2014 jyldyń jóndeý maýsymynda 9 energoblok, 65 qazandyq jáne 45 týrbına kúrdeli túrde jańartylatyn bolady.