Qańtarda qazaqstandyqtar 42 mlrd teńgege jańa kólik satyp aldy
ASTANA. QazAqparat - Aǵymdaǵy jyldyń qańtarynda qazaqstandyqtar jańa avtomobıl, júk kóligi men avtobýs satyp alýǵa 42,2 mlrd teńge nemese 111,5 mln dollar jumsady.
Bul jaıynda Qazaqstannyń avtomobıl salasy kásiporyndarynyń odaǵynan málim etti, dep habarlaıdy QazAqparat tilshisi.
Qańtarda elimizdiń avtomobıl naryǵy turaqty ósim kórsetip, ótken jyldyń sáıkes kezeńimen salystyrǵanda 36 paıyzǵa artty. Osy aıdyń ishinde 4251 jeńil avtomobıl men jeńil kommertsııalyq tehnıka jáne 185 júk kóligi men avtobýs satyldy.
Kóp satylǵan kólikterdiń reıtıngide reseılik brend kósh bastap tur. Bir aıdyń ishinde 1015 Lada satylǵan. Munan keıingi oryndarda Toyota (967) men Hyundai (796) tur. Qazaqstan naryǵynda ótimi joǵary turǵan kólikterdiń munan keıingi reıtıngi tómendegideı tizbektelgen: Kia (337), Volkswagen (185), Renault (150) Nissan (139), GAZ (138), Lexus (120) jáne Chevrolet (72.
Jańa kólikterdiń basym bóligin Astana men Almaty turǵyndary satyp alǵan. Dál osy eki qala turǵyndaryna Qazaqstanda satylǵan kólikterdiń 50 paıyzy tıesili.
Naqty aıtqanda, almatylyqtar 1229, al astanalyqtar 957 jańa kólik satyp alǵan. Úzdik bestikke Atyraý (333), Shymkent (263), Qostanaı (244) qalalary kiredi. Al Taldyqorǵanda bir aı ishinde nebári 33, al Tarazda 38 ǵana jańa kólik satylǵan.
