Qańtarda Qazaqstandaǵy bólshek saýda kólemi 492,8 mlrd. teńgeni qurady
ASTANA. QazAqparat - 2016 jylǵy qańtar aıynda elimizdegi bólshek saýda kólemi 492,8 mlrd. teńgeni qurady nemese 2015 jyldyń qańtarymen salystyrǵanda 92,7 paıyzdy qurady. Bul týraly QR Ulttyq ekonomıka mınıstrligi Statıstıka komıtetinen habarlandy.
Málimetterge qaraǵanda, 2016 jylǵy qańtarda saýda kásiporyndary arqyly taýarlardy ótkizý kólemi 270,5 mlrd. teńgeni qurap, byltyrmen salystyrǵanda 9,6 paıyzǵa tómendegen. Bólshek saýda qurylymynda azyq-túlik emes taýarlar basym bolyp, bul bólshek saýdanyń jalpy kólemine 67 paıyzǵa teń bolǵan. Azyq-túlik emes taýarlardyń bólshek saýdada ótkizilýi ótken jyldyń tıisti aıymen salystyrǵanda 7,8 paıyzǵa, azyq-túlik taýarlar - 5,5 paıyzǵa tómendegen.
«2016 jylǵy 1 aqpanǵa bólshek saýdadaǵy saýdamen aınalysatyn kásiporyndardyń taýarlyq qorlarynyń kólemi 345,2 mlrd. teńgeni qurady, saýdadaǵy kúnderi - 77 kún. Bólshek saýdanyń jalpy kólemindegi asa joǵary úles 2016 jyly qańtarda Almaty qalasy (31,2 paıyz), Astana qalasy (11,1 paıyz) jáne Qaraǵandy qalasyna (9,1 paıyz) tıesili boldy», - delingen baspasóz baıanynda.
