Qańtarda Qazaqstanda ınflıatsııa 1,3% qurady
ASTANA. Qańtar aıynda Qazaqstanda ınflıatsııa 1,3% qurady. Baǵa azyq-túlik taýarlaryna ótken aıda 1,8%, azyq-túlik emes taýarlaryna - 0,9%, aqyly qyzmetterge - 1,2%-ǵa ósti. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlady.
«Ótken aıda baǵanyń ósýi jańadan jınalǵan kókónisterge 8,2%, jumyrtqaǵa - 4,3%, jańadan jınalǵan jemisterge - 3,7%-ǵa, nanǵa, qantqa - 3,2%, kartopqa, qara shaıǵa - 2,8%-dan, keptirilgen jemister men jańǵaqtarǵa - 2,6%, súzbege - 2,2%-ǵa, jarmalarǵa, kúnbaǵys maıyna - 2,1%-dan, máıekti irimshikke - 2%, qus etine - 1,9%, ósimdik-sary maıǵa - 1,8%, konservilengen sútke - 1,7%, makaron ónimderine - 1,3%, kondıterlik ónimderge - 1,2%, toqash jáne unnan daıyndalǵan ónimderge - 1,1%-ǵa tirkeldi», -delingen aqparatta.
Sonymen qatar, baǵa ósimi farmatsevtıkalyq ónimderge 4%, turmystyq aspaptarǵa - 2%, toqyma buıymdaryna, shyny jáne qyshtan jasalǵan ónimderge - 1,9%-dan, jolǵa qajetti taýarlar men zattardy tasymaldaıtyn basqa da buıymdarǵa - 1,5%, jýǵysh jáne tazalaǵysh quraldarǵa, avtomobılderge - 1,2%-dan, jeke qoldanatyn taýarlarǵa - 1%, kıim jáne aıaq kıimge - 0,7% qurady.
Alys qashyqtyqqa qatynaıtyn jolaýshylardyń temirjol kóligine jol júrý aqysy 4,9%, mektepke deıingi bilim berý qyzmetterine - 3,2%, ishki qalalyq qatynastarda avtobýspen jol júrý aqysy - 1,8%, densaýlyq saqtaý qyzmetterine - 1,4%-ǵa qymbattady.
Turǵyn úı-kommýnaldy qyzmetter salasynda tarıfter taratý jelileri arqyly tasymaldanatyn gazǵa 3,4%, sýyq sýǵa - 2,5%, kárizge - 2,2%, elektr energııasyna - 1,3%, ortalyqtan jylytýǵa - 1,1%-ǵa joǵarylady.
