Qańtarda Qazaqstan men Ózbekstannyń energııa júıelerinde bolǵan apattyń sebebi anyqtaldy
NUR-SULTAN. QazAqparat – «Energııa» úılestirý dıspetcherlik ortalyǵynyń («Energııa» ÚDO) arnaıy komıssııasy 2022 jylǵy 25 qańtarda bolǵan apatqa qatysty tergeý-tekserý jumystaryn aıaqtady, onyń quramyna Ortalyq Azııanyń, atap aıtqanda Qazaqstannyń, Ózbekstannyń, Qyrǵyzstannyń energııa júıeleri júıelik operatorlarynyń ókilderi kirgen bolatyn, dep habarlaıdy QazAqparat «KEGOC» AQ baspasóz qyzmetine silteme jasap.
Komıssııa apattyń sebebin Ózbekstannyń energııa júıesinde bolǵan ajyratylýdan týyndaǵanyn anyqtady – osy kúni Nur-Sultan ýaqyty boıynsha saǵat 11:59-da Syrdarııa JES-i men 500 kV «Tashkent» QS-ny (Ózbekstan) qosatyn 500 kV joǵary voltty áýe elektr jetkizý jelisiniń jelilik ajyratqyshynda qysqa tuıyqtalý bolǵan.
«500 kV shınalardyń 1-shi jáne 2-shi júıeleriniń dıfferentsıaldy qorǵanystarynyń shamadan tys jumys isteýi Syrdarııa JES-inde generatsııanyń aıtarlyqtaı tómendeýine, elektr stantsııasyna irgeles elektr jelisindegi ajyratylýlarǵa jáne Qazaqstannyń Birtutas elektr energetıkalyq júıesiniń (BEJ) 500 kV Soltústik-Shyǵys-Ońtústik tranzıtine 2100 MVt mólsherindegi qýat júktemeden tys túsirilýine (belgilengen normadan 7 ese joǵary) ákeldi», - degen aqparat berdi kompanııanyń baspasóz qyzmeti.
Júıeli apattar kezinde «KEGOC» AQ elektr jelileri men Qazaqstannyń ońtústigindegi elektr stantsııalarynyń apatqa qarsy avtomatıkasy energııa júıesin bólý jónindegi talaptardy eskere otyryp, shtattyq rejımde iske qosyldy. Osynyń arqasynda elimizdiń ońtústik tutynýshylarynyń shamamen 60%-yn elektrmen jabdyqtaýdy saqtaı otyryp, Qazaqstannyń ońtústik aımaǵy tutynýshylarynyń tolyq ajyratylýyna jol berilmedi. Bul rette Ózbekstan men Qyrǵyzstannyń energııa júıeleri tolyǵymen toqtan ajyratyldy.
«KEGOC kompanııasyna apatty joıýǵa jáne Qazaqstandaǵy barlyq tutynýshylarǵa qoıylǵan shekteýlerdi alyp tastaýǵa 4 saǵat qajet bolǵanyn, sondaı-aq buǵan Qazaqstan BEJ-i Júıelik operatory personalynyń joǵary kásibı sheberliginiń nátıjesinde qol jetkizgenin atap ótken jón. Al Qyrǵyzstan UET-te shema men rejım bir táýlikten astam ýaqyttan keıin qalpyna keltirilse, Ózbekstan UET-te tutynýshylardy energııamen jabdyqtaýdy qalpyna keltirý tórt kúnge sozyldy», - delingen «KEGOC» AQ jarııalaǵan habarlamada.
