Qańtarda Atyraý oblysynan 4 myńnan astam túlek UBT tapsyrady

ATYRAÝ. QazAqparat – Qańtar aıynda Atyraý oblysyndaǵy mektepterdiń 4271 túlegi UBT tapsyrady, dep habarlaıdy QazAqparat.

Atyraýda ulttyq biryńǵaı testileý 16, 17, 18, 19 qańtar kúnderi ótedi. Synaq tapsyrýshylar 4 lekke bólingen. Atyraý qalasynda osyndaǵy jergilikti mektepterdi támamdaǵan 2110 túlek, sonymen qatar Maqat, Mahambet, Isataı aýdandarynan 643 adam UBT tapsyrady.

Al Qurmanǵazy, Inder, Qyzylqoǵa aýdandary men Qulsary qalasynyń abıtýrıentteri óz aýdanynda testileýden ótedi.

Eske sala keteıik, jańa erejege sáıkes ótken jyldan beri ulttyq biryńǵaı testileý jylyna 4 ret ótkiziledi: qańtar, naýryz, maýsym jáne tamyzda. Qańtar, naýryz jáne tamyz aılarynda tapsyrylǵan UBT sertıfıkaty túlekterdiń ýnıversıtette aqyly túrde oqýyna múmkindik beredi. Eger talapker jergilikti atqarýshy organdardyń grantynan úmittense, ol mindetti túrde maýsymda ótetin UBT-ǵa qatysýy tıis.

«Mektep bitirýshiler testileýden birneshe ret óte alady. Ár synaqtyń nátıjesi bólek esepteledi, sondyqtan talapkerler eshbir synaqty nazardan tys qaldyrmaı, barlyǵynan ótkeni abzal», - deıdi Ulttyq testileý ortalyǵy H. Dosmuhamedov atyndaǵy Atyraý memlekettik ýnıversıtetindegi fılıalynyń basshysy Aınagúl Dúısekenova.

Mamandardyń sózine sensek, bıyl Atyraý oblysyndaǵy túlekter arasynda UBT tapsyrý kórsetkishi 90 paıyzǵa jýyqtaıdy.