Qańtarda Almaty qalasynda 23 balabaqsha ashyldy - G. Aıtqulova
ALMATY. QazAqparat- Almatyda qańtar aıynda barlyǵy 675 oryndyq jańa 23 balabaqsha ashyldy. Bul týraly búgin Almatyda ótken baspasóz brıfıngi barysynda Almaty qalalyq bilim basqarmasy basshysynyń orynbasary Gúlnar Aıtqulova málim etti.
«Almaty qalasynyń ákimdigi qalada balabaqshalar sanyn kóbeıtý maqsatynda bıyl memlekettik-jeke menshik áriptestik aıasynda 24 ınvestormen kelisim jasasty. Sonyń arqasynda Almatyda qańtar aıynyń ishinde barlyǵy 675 orynǵa shaqtalǵan jańa 23 jeke balabaqsha ashyldy. Olardyń 14-inde memlekettik «Balapan» baǵdarlamasy engizildi. Sondaı-aq, eger olarǵa memlekettik tapsyryspen balalar ornalastyrylatyn bolsa, ata-analar aıyna 15 myń teńgeden artyq aqsha tólemeıdi. Al basqa ata-analar úshin baǵany balabaqshanyń ıesi belgileıdi», - dedi G. Aıtqulova.
Sonymen qatar, ol kommýnaldyq menshiktegi balabaqshalar boıynsha qaıta esepteýler jasalǵandyǵyn jetkizdi.
«Balabaqsha qunyn burynǵy tarıfpen tólep qoıǵan ata-analar úshin qazir qaıta esepteýler júrgizildi. ıAǵnı, ata-analardyń artyq tólep qoıǵan aqshalary kelesi aıdyń esebine aýdarylatyn bolady. Al balabaqsha qunyn tóleý tetigine keler bolsaq, mekeme basshylyǵy aılyq tólemaqylardy tóleý boıynsha ata-analarmen kelise otyryp, bankti ózderi tańdaıdy.
Taǵy bir aıta ketetin jaıt, bıylǵy jyldyń naýryz jáne sáýir aılary ishinde Almatyda jalpy 640 oryndyq eki memlekettik balabaqsha paıdalanýǵa beriledi», - dedi G. Aıtqulova.
Búgingi tańda Almatyda 420 bala baqsha jumys isteıdi. Olarǵa 54 401 bala barady. Al kezekte turǵan balalardyń sany - 38 myńnan asady.
