Qańtarda Almaty ákimdigi men Prezıdent rezıdentsııasyn basyp alǵan 11 adamǵa úkim shyqty
ALMATY. KAZINFORM — Almatynyń qylmystyq ister jónindegi mamandandyrylǵan aýdanaralyq sotynda jappaı tártipsizdik pen shabýylǵa qatysyp, kúzetiletin obektilerdi basyp aldy, sondaı-aq bılik ókilderine zorlyq-zombylyq kórsetti (QK 272, 269, 380-baptary) dep aıyptalǵan 11 sottalýshynyń isi qaraldy.
2022 jyldyń 4-5 qańtarynda sottalýshylar jappaı tártipsizdikke qatysyp, qorǵalatyn obektilerge — Almaty qalasynyń ákimdigine, Prezıdent rezıdentsııasyna, polıtsııa keńsesine zańsyz kirgen.
Sottalýshylardyń qylmystyq áreketi múliktiń joıylýyna ulasyp aýyr zardaptarǵa ákeldi.
Tártipsizdik barysynda úsh sottalýshy áskerı qyzmetshiler men quqyq qorǵaý organdarynyń qyzmetkerlerine zorlyq-zombylyq kórsetti.
Al, sottalýshylardyń bireýi eki áskerı kýrsantty tutqynǵa alyp, olarǵa jeńil dene jaraqatyn salǵan.
Sottalýshylar kinásin jartylaı moıyndady.
Atalǵan qylmystar aýyr jáne asa aýyr qylmystar sanatyna jatady.
Jaza taǵaıyndaý kezinde sot jaýapkershilikti jeńildetetin mán-jaıdy eskerdi. Sottalýshylardyń kámeletke tolmaǵan balalary bary, densaýlyǵy, otbasylyq jaǵdaıy jáne buryn sotty bolmaǵany esepke alyndy.
Joǵaryda aıtylǵandardy eskere otyryp sot 10 sottalýshyny QK 272-babynyń 2-bóligi, 380-babynyń 3-bóligi, 269-babynyń 3-bóligi-1), 4), 8) tarmaqshalary boıynsha kináli dep tapty.
Raqymshylyq týraly zańdy qoldana otyryp, árqaısysy 1 jyl 9 aıǵa bas bostandyǵynan aıyryldy.
Bir sottalýshy QK 272-babynyń 2-bóligi, 380-babynyń 3-bóligi, 1), 4), 8) tarmaqtary, 269-1-babynyń 3-bóligi, 261-babynyń 3-bóligi boıynsha kináli dep tanyldy.
Ol Raqymshylyq týraly zań aıasynda 4 jylǵa bas bostandyǵynan aıyryldy.
Úkim zańdy kúshine engen joq.
