Qańtarda Ál-Farabıdiń 1150 jyldyǵy resmı ashylady
«Biz Ál-Farabıdiń 1150 jyldyq mereıtoıyn atap ótý arqyly kúlli túrki dúnıesiniń kıeli mekeni Uly dalada, kóne qazaq jerinde órkenıettiń saltanat qurǵanyn álemge taratatyn bolamyz, Táýelsiz elimizdi, halqymyzdy nasıhattaımyz. Sondyqtan Memleket basshysynyń tapsyrmasyna oraı Ál-Farabı mereıtoıyn negizinen ǵylymı, ıntellektýaldyq baǵytta atap ótip, jyl boıynda halyqaralyq, respýblıkalyq jáne óńirlik aýqymda taqyryptyq arnaıy jobalar, ǵylymı-aǵartýshylyq jáne mádenı-buqaralyq is-sharalar ótkizilýi tıis. Olardyń ıntellektýaldyq deńgeıine erekshe nazar bólinsin», - dedi ol Ábý Nasyr Ál-Farabıdiń 1150 jyldyq mereıtoıyn daıyndaý jáne ótkizý jónindegi memlekettik komıssııa otyrysynda.
Onyń aıtýynsha, mereıtoıdy atap ótýdiń respýblıkalyq josparynyń jobasy ázirlengen. Onda respýblıkalyq jáne óńirlik deńgeıde ótetin 50-den astam is-shara kózdelgen. Olardyń qatarynda halyqtyq barlyq býynyn qamtıtyn arnaıy jobalar, ǵylymı taldaý, qoǵamdyq mańyzdy jáne mádenı-buqaralyq is-sharalar bar.
«Ál-Farabıdiń 1150 jyldyq mereıtoıyn bastaýdyń resmı rásimin 2020 jyldyń 10 qańtarda Ál-Farabı atyndaǵy Qazaq ulttyq ýnıversıtetindegi «Ál-Farabı» ortalyǵynyń halyqaralyq tusaýkeserimen qosa ótkizý usynylyp otyr», - dedi Q.Kósherbaev.
