Qańtarda 4 jasar Aıkórkemdi atty dep aıyptalǵan áskerı qaıta sottaldy

ASTANA. KAZINFORM — Áskerı sottyń qylmystyq ister jónindegi sot alqasy qarý qoldaný arqyly bıligin asyra paıdalandy dep aıyptalǵan (QK 451-baby 2-bóliginiń 1 tarmaǵy) áskerı qyzmetshi Arman Jumannyń isin apellıatsııalyq tártipte qaıta qarady. 

Buǵan deıin kassatsııalyq sot alqasy jábirlenýshi taraptyń shaǵymy men prokýrordyń narazylyǵy negizinde apellıatsııalyq sot alqasy úkiminiń kúshin joıyp, ekinshi satyly sotqa qaıta qaraýǵa joldaǵan.

Qylmystyq is jabyq sot otyrysynda «qupııa» belgisimen qaralǵan.

Oqıǵa bylaı bolǵan.

2022 jyly 7 qańtar saǵat 19.30 shamasynda sottalýshy Juman blokbekette qaramaǵyndaǵy áskerı qyzmetshilerge beketke jaqyndap kele jatqan avtokólikke oq atý jóninde zańsyz buıryq bergen.

Saldarynan 2017 jyly týǵan jas bala oq jaraqatynan qaıtys bolyp, 2006 jyly týǵan taǵy bir balaǵa 5 oqtan densaýlyǵyna aýyr zııan keldi. 

Sottalýshynyń kinási is boıynsha jınalǵan dáleldemelermen, ıaǵnı jábirlenýshiler men kýágerlerdiń aıǵaqtarymen, sot saraptamasynyń qorytyndysy jáne zattaı dáleldemelermen dáleldendi.

Áskerı sottyń sot alqasy aqtaý úkiminiń kúshin joıyp, jańa úkim shyǵardy.

Oǵan sáıkes QK 451-baby 2-bóliginiń 1-tarmaǵy boıynsha Juman kináli dep tanylyp, 7 jylǵa bas bostandyǵynan aıyryldy.

Apellıatsııalyq úkim zańdy kúshine endi.

Eske sala keteıik, byltyr qarashada áskerı sot Arman Jumandy kinásiz dep tanyp, tolyq aqtaǵan edi. 

Alaıda bıylǵy naýryzda apellıatsııa alqasy ony 7 jylǵa sottady. 

6 maýsymda Joǵarǵy sot bul isti qaıta qaraýǵa jiberdi.