Qańtar–aqpanda 665 mlrd teńgeniń azyq-túligi óndirildi – AShM

ASTANA. KAZINFORM – Elimizde qańtar–aqpan aılarynda azyq-túlik óndirisi 665 mlrd teńgeni qurady. Alaıda elde belgilengen kórsetkishterge qol jetkize almaı otyrǵan óńirler de bar. Bul týraly Aýyl sharýashylyǵy mınıstri Aıdarbek Saparovtyń tóraǵalyǵymen keńeste aıtyldy, dep habarlaıdy mınıstrliktiń baspasóz qyzmeti.

Jıyn barysynda baǵany turaqtandyrý maqsatynda óńirler turaqtandyrý qorlaryn qalyptastyrýǵa 42,5 mlrd teńge, al «aınalym shemasyna» 78,2 mlrd teńge bólgeni aıtyldy. Maýsymaralyq kezeńde jalpy kólemi 247 myń tonna ónim qory jasaqtaldy (kartop, pııaz, qyryqqabat, sábiz). Degenmen, keı jaǵdaılarda naryqtyq ınterventsııa ýaqytynda júrgizilmeı, bul sharalardyń tıimdiligine keri áser etken.

-Osy jyldyń qańtar–aqpan aılarynda azyq-túlik óndirisi 665 mlrd teńgeni qurap, naqty kólem ındeksi 111,9 paıyzǵa jetti (jospar – 104,3%). Alaıda birqatar óńir jospardy oryndaı almaǵan, olardyń qatarynda Batys Qazaqstan, Qyzylorda, Mańǵystaý oblystary, Ulytaý óńiri jáne Almaty qalasy bar,-delingen habarlamada. 

Keńes barysynda baǵa ósimi tym joǵary óńirlerdiń ókilderi tyńdaldy.

Jıyn qorytyndysynda mınıstr ákimdikterge baǵany turaqtandyrý jáne óndiristi arttyrý boıynsha az ýaqyttyń ishinde shuǵyl ári naqty sharalar qabyldaýdy tapsyrdy.

Basym baǵyttardyń qatarynda kókónis ónimderin ýaqtyly aldyn-ala kelisimshartpen satyp alý, ońtústik óńirlermen erte kókónis jetkizý boıynsha kelisimder jasaý, turaqtandyrý qorlaryn tıimdi paıdalaný jáne olardy tolyqtyrý sharalary bar.

-Azyq-túlik qaýipsizdigi men baǵa turaqtylyǵy Úkimettiń erekshe baqylaýynda. Osy rette barlyq deńgeıde júıeli jumys júrgizilip, baǵanyń ósýine jol bermeý jáne ishki naryqty úzdiksiz qamtamasyz etý qajet, – dedi Aıdarbek Saparov.

Osyǵan deıin mınıstrlik azyq-túlik baǵasy respýblıkalyq deńgeıden joǵary óńirlerdi atady.