Qańtar týraly opponentter taratqan daqpyrttarǵa jaýap bere almaı kelemiz – Májilis depýtaty
«Biz áli de Qańtardyń barsha aqıqaty men shyndyǵyn túsingen joqpyz. Kerek deseńizder, osy tragedııadan keıin paıda bolyp, opponentterimiz qasaqana taratyp jatqan demagogııalyq daqpyrt pen jalǵan aqparattar legine júıeli jaýap bere almaı kelemiz. Tergeý men sot bitkenin ǵana kútip jatpaı, ıdeologııalyq jumysty elge tónip otyrǵan qaterler deńgeıine kóteretin kez keldi dep sanaımyn. Ol úshin jańa eshteńe oılap tabýdyń qajeti joq. Tek bar aqıqat pen shyndyqty batyl aıtyp, derek pen dáıek arqyly dáleldeı bilýimiz shart», - dedi Aıdos Sarym Májilistiń búgingi otyrysynda.
Depýtat Qańtar oqıǵasy o basta beıbit sherý retinde bastalǵanyn eske saldy.
«Ókinishke oraı, ońtústik óńirlerde, Almaty, Jambyl, Túrkistan oblystarynda krımınaldyq, revanshıstik kúshterdik aralasýynan is nasyrǵa shaýyp, jappaı tártipsizdikterge, qarýly búlikke ulasyp ketti. ıAǵnı biz beıbit sherý men jappaı tártipsizdikter, beıbit narazylyq pen memlekettik tóńkeristi shatastyryp almaýymyz qajet. Qańtar oqıǵasy kezinde memleketti saqtap qalǵan eki faktor bar: biri – qazaq halqynyń parasaty men birlikke degen umtylysy, ekinshisi – prezıdentimiz der kezinde qabyldaǵan tarıhı sheshimderi. Memleket basshysy sol kúnderi tabandylyq tanytpaǵanda, Qaýipsizdik keńesiniń tizginin ózine almaǵanda, biz búgingi jıyndy ótkizip otyrmas edik. Kerek deseńizder, adam shyǵyny da júzdegen emes, myńdaǵan, ondaǵan myń adammen eseptelip, qaraly tizim áli kúnge deıin jalǵasyp jatar edi», - dedi Aıdos Sarym.
Sonymen birge, depýtat UQShU áskeriniń elge kelýi týraly daqpyrt taraǵanyn aıtty.
«Orys nemese qyrǵyz áskeri halyqqa oq atty degen daqpyrt bar. Shyndyǵynda olaı bolmaǵan. UQShU qosyndary óz elimizdiń arnaıy mamandandyrylǵan kúshterin bosatyp, eldegi konstıtýtsııalyq tártipti ornatý jumystaryna baǵyttaýǵa jol ashty. UQShU-nyń birde-bir sarbazy el ishine aralasqan emes, aralasýy da múmkin emes edi. Olar tek tehnıkalyq kómek fýnktsııasyn júzege asyrdy.Eldiń, memlekettiń Táýelsizdigi, turaqtylyǵy tek óz áskerimizdiń, polıtsııamyzdyń arqasynda ǵana júzege asty. Bul turǵydan qazaq eli eshkimge de qaryzdar bolǵan emes, bolmaıdy da», - dedi Májilis depýtaty.
