Qańtar tragedııasy: Kúdiktilerden 107 mln teńgeniń múlki tárkilengen

NUR-SULTAN. QazAqparat – QR Іshki ister mınıstrligi qańtardaǵy tártipsizdikter kezinde qoldy boldy delingen 107 mln teńgeniń múlki tárkilengenin málim etti, dep habarlaıdy QazAqparat tilshisi.

«1 aqpanda Qyzylordadaǵy jappaı tártipsizdik kezinde lombardtardyń birinen urlyqqa túsken eki turǵyn ustalyp, ýaqytsha ustaý abaqtysyna qamaldy. Olardan 160-tan astam altyn buıym alyndy.

Almatydaǵy tártipsizdikter kezinde «Іsker Lombard» uıymyna 41 mıllıon teńge shyǵyn kelgen. Sol tonaýǵa qatysqandardyń biri ustaldy. Kúdiktiden urlanǵan zattardyń bir bóligi alyndy. Onyń kinásin dáleldeıtin beıne jazba bar», - delingen mınıstrliktiń málimetinde.

Іshki ister mınıstrligi taratqan aqparatqa sensek, tártipsizdik kezinde urlandy delingen 107 mln teńgeniń múlki qaıtarylǵan.

«Onyń ishinde 8 avtokólik, 360-tan astam turmystyq tehnıka, 200-den astam zergerlik buıym, 460 kıim, 238 uıaly telefon, 15,5 mln teńge bolatyn qolma-qol aqsha tárkilendi.

Urlyq pen tonaý, onyń ishinde qarý urlaý faktileri boıynsha 322 kúdikti ustalyp, ýaqytsha ustaý ızolıatoryna qamaldy.

Tergeý barysynda basty nazar istiń mán-jaılary men kúdiktilerdiń ýájderin muqııat tekserýge, dáleldemelerdi jınaýǵa aýdarylady», - dep jazady Іshki ister mınıstrliginiń baspasóz qyzmeti.