Qańtar tragedııasy: Almatyda ǵımarattardy órteý kezinde túsirilgen jańa vıdeo paıda boldy

NUR-SULTAN. QazAqparat – Áleýmettik jelide qańtar oqıǵalary beınelengen vıdeolardyń kezekti tolqyny tarap jatyr. Sonyń birinde Almatydaǵy memlekettik mekemeler otqa oranǵan kezde mańaıynda júrgen adamdar túsip qalǵan, dep habarlaıdy QazAqparat tilshisi.

Túrli kadrlerden jınaqtalǵan vıdeonyń basynda órtenip jatqan ǵımarattyń mańynda qaptap júrgen adamdar tobyn kórýge bolady. Biri jaıbaraqat sýretke túsip jatsa, taǵy biri tanysynyń atyn atap, ıesiz qalǵan kaskany usynady. Ersili-qarsyly adamdardyń bir shetinde namazǵa jyǵylý ısharatyn jasap jatqan birneshe adamdardyń sulbasy túsip qalǵan. Osy kadr kezinde «Alahý akbar» degen uran estiledi.

Taǵy bir kadrde órtenip jatqan ǵımarattyń aýzynda biri kirip, biri shyǵyp jatqan adamdardyń toby kórinedi. Sońǵy kadrden jaryǵy joq ǵımarattyń ishin vıdeoǵa túsirip júrgen adamdardyń ózara orys tilinde sóılesip júrgenin kórýge bolady. Olar baspaldaqta jatqan adamnyń janyna kelgen kezde kadr úzilip ketedi.