Qańtar tragedııasy: Almaty turǵyndary qarý satpaq bolǵandardy polıtsııaǵa ustap bergen

NUR-SULTAN. QazAqparat – Іshki ister mınıstrliginiń arnaıy mamandary qańtardaǵy tártipsizdikterge qatysy bar adamdardyń tulǵasyn anyqtaý úshin oqıǵa oryndarynda alynǵan saýsaq izderin zerttep jatyr, dep habarlaıdy QazAqparat tilshisi.

Bul jóninde ІІM Tergeý departamentiniń bastyǵy Sanjar Ádilov aıtty.

«Qazir ІІM-niń krımınalısteri alynǵan izder boıynsha qylmyskerlerdiń jeke basyn anyqtap jatyr.

Tergeýshiler 15 myńnan astam tergeý áreketin júrgizdi. Onyń ishinde jábirlenýshilerden, kýálar men kúdiktilerden jaýap alý, bettestirý, qarap-tekserý, tintý jáne taǵy basqa sharalar oryndaldy.

Tergeý organdaryna dáleldemelerdi jınaýǵa jáne quqyq buzýshylardy ustaýǵa kómektesetin azamattarǵa erekshe alǵysymdy bildiremin», - dedi Sanjar Ádilov.

Sondaı-aq, quqyq qorǵaý organdaryna osy baǵytta kómek kórsetken almatylyqtardyń batyl áreketine jeke toqtaldy.

«Máselen, Almaty oblysyndaǵy eldi-mekenderdiń birinde turǵyndar urlanǵan qarýdyń 6 danasyn satý áreketiniń jolyn kesip, polıtsııaǵa tapsyrdy.

Atalǵan fakti boıynsha sotqa deıingi tergep-tekserý bastalyp, kúdiktiler qamaýǵa alyndy. Olardyń Almatydaǵy áýejaı ǵımaratyndaǵy saýda obektilerin tonaýǵa da qatysy bar ekeni anyqtaldy», - dedi ІІM ókili.