Qańtar tragedııasy: 893 kúdiktiniń 792-si qamaýǵa alynǵan

NUR-SULTAN. QazAqparat – QR Іshki ister mınıstriniń birinshi orynbasary Marat Qojaev QR Parlament Májilisindegi adam quqyqtary máselesine arnalǵan dóńgelek ústelde qańtardaǵy tártipsizdikter boıynsha qozǵalǵan qylmystyq ister jóninde sońǵy málimetterdi aıtty, dep habarlaıdy QazAqparat tilshisi.

«Qańtardaǵy tártipsizdikterge baılanysty mınıstrlikke azamattardy qamaý oryndaryna zańsyz jetkizý, ustaý, jaýapkershilikke tartý týraly kóptegen shaǵym tústi. Árbir osyndaı fakti boıynsha, shaǵym men jarııalanym boıynsha tyńǵylyqty tekserý júrgiziledi. Eger ol málimet rastalsa, dereý shara qoldanylady», - dedi ІІM ókili.

Vedomstvonyń birinshi vıtse-mınıstri qańtar oqıǵasy boıynsha ustalǵandardyń isi arnaıy prokýrorlardyń baqylaýynda ekenin eske saldy.

«Memleket basshysynyń tapsyrmasy boıynsha terrorıstik aktilerdiń, jappaı tártipsizdikterdiń sebepteri men uıymdastyrýshylaryn anyqtaý jumystary Bas Prokýratýraǵa júktelgenin esterińizge salǵym keledi. Osyǵan baılanysty atalmysh sanattaǵy jáne osy oqıǵalarmen baılanysty isterdiń bári arnaıy prokýrorlar basqaratyn vedomstvoaralyq tergeý tobyna berildi», -dedi ol.

Aıtýynsha, qazir Іshki ister organdary qańtar oqıǵasyna qatysy bar degen 792 adamdy qamaýǵa alǵan.

«Qazirgi tańda ishki ister organdarynda 2,5 myńnan astam qylmystyq is tergelip jatyr. Onyń negizgi bóligi tonaý men urlyqqa qatysty. Qylmys jasady degen kúdikpen ýaqytsha ustaý ızolıatoryna 893 adam jetkizildi. Sonyń 792-si qamaýǵa alyndy. Ustalǵandardyń kinási qoldy bolǵan, zaqym kelgen múlik túrindegi tárkilengen zattaı aıǵaqtardyń, vıdeo, foto materıaldardyń jáne tergeý organdarynyń basqa da protsessýaldyq sharalarynyń kómegimen dáleldenip jatyr», - degen ІІM ókili isterdiń bári qylmystyq protsestiń úsh býyndy modeli aıasynda iske asyp jatqanyn atady.