Qańtar tragedııasyn aqparattyq aıla-sharǵy quraly retinde paıdalaný jalǵasady – Abzal Quspan
Májilis depýtaty, 2022 jylǵy qańtar oqıǵasynan keıin qurylǵan «Amanat» qoǵamdyq komıssııasynyń tóraǵasy Abzal Quspan Maqsut Narikbayev University janyndaǵy MIND ǵylymı-taldaý ortalyǵynda 2022 jylǵy qańtardaǵy oqıǵalardy taldaýǵa arnalǵan baıandamasyn tanystyryp, negizgi tezısterine toqtaldy, dep Kazinform.
Talqylaýǵa qańtar oqıǵalaryn baǵalaýǵa mamandanǵan jáne óz jumysynda osy taqyrypty kóterip júrgen sarapshylar men jýrnalıster qatysty.
Baıandamada 2022 jyldyń qańtaryndaǵy oqıǵalar zańdy bılikti qarýly kúshpen qulatýǵa baǵyttalǵan el tarıhynda alǵashqy uıymdasqan áreket bolǵany aıtylady.
«Jappaı tártipsizdikterdiń batystan ońtústikke qaraı turaqsyzdandyratyn qozǵalysy resýrstyq aımaqtardy, kólik baılanystaryn qamtydy. Aımaqtardaǵy bılikti basyp alý jónindegi úılestirilgen is-sharalar eldiń batysynan shyǵysyna qaraı turaqsyzdyq sheńberin ornatyp, ortalyq aımaqtar men Astanany qorshap, olardy oqshaýlaý úshin quryldy», - deıdi Abzal Quspan.
Baıandama avtory Qańtar tragedııasyn qazirgi bıliktiń reformalaryna kedergi keltirý úshin paıdalaný tájirıbesi bar ekenin aıtady.
«2022 jylǵy 3-6 qańtarda Qazaqstanda bolǵan oqıǵalar el ishinde jáne odan tys jerlerde aqparattyq aıla-sharǵy jasaý quralyna aınaldy. Belgili bir yqpal etý toptary áli kúnge deıin qazirgi bıliktiń bedelin túsirý jáne reformalardy qunsyzdandyrý maqsatynda aqparattyq shabýyldar úshin Qańtar tragedııasyn qoldanýda jáne bolashaqta da qoldanýyn jalǵastyrady», - deıdi «Amanat» qoǵamdyq komıssııasynyń tóraǵasy.
