Qańtar-tamyzda ІJÓ ósimi 5,6 paıyzdy qurady - Statıstıka agenttigi
ASTANA. 14 qyrkúıek. QazAqparat - Bıylǵy qańtar-tamyzda ishki jalpy ónim ósimi 5,6 paıyzdy qurady.
Bul týraly búgin Astanada ótken brıfıngte QR Statıstıka agenttiginiń tóraǵasy Álıhan Smaıylov málim etti.
«Boljamdyq esepteýler boıynsha qańtar-tamyzda ІJÓ kólemi 5,6 paıyzǵa ósti»,-dep atap ótti agenttik basshysy.
Onyń sózine qaraǵanda, ónerkásip salasyndaǵy ósim qarqyny keıbir sebeptermen tejeldi. Degenmen, qurylys salasynda ósý qarqyny baıqaldy. «Sondaı-aq, aýyl sharýashylyǵy salasynda ındeks birshama ósti. Bul óz kezeginde tamyzda egin oraǵy byltyrǵyǵa qaraǵanda erte jınala bastaýymen baılanysty. Sondyqtanda egin oraǵynyń eleýli kólemi tamyz aıyna tıesili, osyǵan oraı ındeks birshama ósip otyr»,-dedi Á. Smaıylov.
Agentttik tóraǵasynyń sózinshe, keıingi aılarda ındeks tómendeýi múmkin. Sebebi bıyl qurǵaqshylyq saldarynan astyq kólemi ótken jylǵa qaraǵanda tómen.
