Qańtar-tamyzda elimizde jarty mıllıonǵa jýyq jeńil avtomobıl tirkelgen
NUR-SULTAN. QazAqparat - 2020 jyldyń qańtar-tamyzynda elimizde 474 786 jeńil avtomobıl tirkeldi. Mundaı derekti Statıstıka komıteti usyndy dep habarlaıdy QazAqparat tilshisi.
«2020 jylǵy qańtar-tamyzda Qazaqstan Respýblıkasynda 474 786 jeńil avtomobıl tirkelgen. Bul ótken jylǵy tıisti kezeńmen salystyrǵanda 17,1 paıyzǵa kem. Qazaqstan Respýblıkasynda 2020 jylǵy 1 qyrkúıektegi jaǵdaı boıynsha tirkelgen jeńil avtomobılderdiń sany - 3 891,8 myń» delingen vedomstvo aqparatynda.
Sonymen qatar komıtet dereginshe, osy jylǵy qańtar-qyrkúıekte 7 541 jol-kólik oqıǵasy tirkelip, 10 979 adam zardap shekken. Ótken jylǵy tıisti kezeńmen salystyrǵanda apat jaǵdaılary 25,4 paıyzǵa kemidi.
«2020 jylǵy 1 qyrkúıektegi jaǵdaı boıynsha kólik quraldary ıeleriniń azamattyq-quqyqtyq jaýapkershiligin mindetti saqtandyrý boıynsha saqtandyrý uıymdary 18 mlrd teńge somasynda 43 929 saqtandyrý tólemin jasady» dep atap ótedi komıtetten.
