Qańtar-tamyz aılarynda ónerkásip óndirisiniń kólemi 10,9 paıyzǵa ósti - Statıstıka agenttigi
ASTANA. Qyrkúıektiń 13-i. QazAqparat /Marlan Jıembaı/ - Qańtar-tamyz aılarynda ónerkásip óndirisiniń kólemi 10,9 paıyzǵa ósti. Bul týraly búgin elordada elimizdiń aǵymdaǵy jyldyń qańtar-tamyz aılaryndaǵy áleýmettik-ekonomıkalyq damýynyń qysqasha qorytyndylaryna arnalǵan baspasóz máslıhaty barysynda QR Statıstıka agenttiginiń tóraǵasy Álıhan Smaıylov málim etti.
«Qańtar-tamyz aılarynda ónerkásip óndirisiniń kólemi 10,9 paıyzǵa ósti. Onyń ishinde ken óndirý ónerkásibi 5,8, óńdeý ónerkásibi 19, al elektrmen jabdyqtaý, gaz, bý berý jáne aýa baptaýda órleý qarqyny 7,6 paıyzdy qurady. Sýmen jabdyqtaýda 5,9 paıyz ósim baıqaldy», dedi ol óz sózinde.
Sonymen qatar Statıstıka agenttiginiń atap ótýinshe, aýyl sharýashylyǵy jalpy óniminiń kólemi 2,6 paıyzǵa artqan.
Ataǵan mekemeniń keltirgen derekterine sáıkes, aǵymdaǵy jyldyń qańtar-tamyz aılarynda aýyl sharýashylyǵy jalpy óniminiń kólemi 604,7 mıllıard teńgeni quraǵan.
