Qańtar-tamyz aılarynda bólshek saýda kólemi 13,2 paıyzǵa joǵarlap, 1840,8 mlrd.teńgege jetti - Statıstıka
ASTANA. Qyrkúıektiń 15-i. QazAqparat - Aǵymdaǵy jyldyń qańtar-tamyz aılarynda ótken jylǵy tıisti kezeńmen salystyrǵanda bólshek saýda kólemi 13,2 paıyzǵa joǵarylap, 1840,8 mlrd.teńgege jetti. Bul aqparatty elimizdiń Statıstıka agenttigi taratyp otyr.
Sondaı-aq vedomstvonyń atap ótýinshe, aǵymdaǵy jyldyń tamyzynda ótken jyldyń tamyzymen salystyrǵanda taýarlardy bólshek saýdada ótkizý kólemi 13,2 paıyzǵa al, 2010 jyldyń ótken aıymen salystyrǵanda 3,6 paıyzǵa joǵarylaǵan. 2010 jyly bólshek saýdany turaqty jelilerde júzege asyratyn saýda kásiporyndarynyń qyzmeti birtindep turaqtanyp keledi. Sonymen, aǵymdaǵy jyldyń qańtar-tamyz aılarynda saýda kásiporyndary arqyly taýarlardy ótkizý kólemi ótken jylǵy qańtar-tamyz aılaryna qaraǵanda 1017,0 mlrd. teńgege nemese 15,9 paıyzǵa artyq. Munyń ózinde, bólshek saýdanyń jalpy kólemindegi saýda kásiporyndarynyń úlesi 1,2 paıyzdyq tarmaqqa joǵarylady (2009 jylǵy qańtar-tamyzda 54 %-ǵa, 2010 jylǵy qańtar-tamyzda 55,2 %-ǵa).
Halyqtyń muqtajdyǵyn ár túrli taýarlarmen qamtamasyz etý otandyq óndiris esebinen (kóp jaǵdaıda azyq-túlik taýarlary boıynsha), sonymen qatar, ózge elderdiń ımporty esebinen (azyq-túlik emes taýarlary boıynsha) júzege asyrylady. Máselen, un (99,9 % resýrstardyń jalpy kóleminde), jumyrtqa (92,5 %), et jáne et ónimderi (85,7 %), makaron ónimderi (84,8 %), jarma (78,8 %), sút ónimderi (74,5 %), qant (68,1 %), ósimdik maıy (67,4 %), margarın (57,7 %), sary maı (62,3 %) resýrstary respýblıkadaǵy óndiris esebinen qalyptassa, al muzdatqyshtar (100 %), kilem jáne kilem buıymdary (99,9 %), jún matalary (98,3 %), jýý quraldary (96,7 %), kıimder (90 %), shulyq ónimderi (74,8 %), kir jýatyn mashınalar (72,8 %), aıaq kıim (64,8 %), teledıdarlar (56,6 %) resýrstary ımporttyq túsimder esebinen toltyrylady», delingen baspasóz habarlamasynda.
