Qańtar-tamyz aralyǵynda Qyzylorda oblysynyń damý kórsetkishi qalaı boldy
Memleket basshysynyń tapsyrmasymen Qazaqstan óńirlerinde oblystyń áleýmettik-ekonomıkalyq damýyna, azamattardyń ál-aýqatyn arttyrýǵa, turǵyndardyń tabysyn ósirýge jáne ómir súrý sapasyn jaqsartýǵa baǵyttalǵan birqatar memlekettik baǵdarlamalar belsendi júzege asyrylyp jatyr. Memleket basshysynyń tapsyrmasynyń Qyzylorda oblysynda iske asyrylý barysy týraly RrimeMinister.kz materıalynda.
Qyzylorda oblysy 1938 jyly 15 qańtarda qurylǵan. Oblys Qazaqstannyń ońtústik-batys bóliginde ornalasqan, jalpy aýmaǵy 226 myń km², bul búkil respýblıka aýmaǵynyń 8,3% quraıdy.
2019 jylǵy 8 aıda agrarlyq ónim óndirisi 2,7%-ǵa artty
Bıyl qańtar-tamyz aılarynda aýyl sharýashylyǵy jalpy ónimniń kólemi 36,8 mlrd teńgeni qurap, 2018 jyldyń tıisti kezeńine 2,7%-ǵa artty. Sıyr malynyń basy 7,5%-ǵa (178 myń bas), qoı – 9,9%-ǵa (557,6 myń bas), jylqy – 12,6%-ǵa (143,7 myń bas), túıe – 6,7%-ǵa (50,5 myń bas) kóbeıdi. Tiri salmaǵynda 22,3 myń tonna (103,1%) et, 55,5 myń tonna sút (101,5%), 5,5 mln dana jumyrtqa (109,2%) óndirildi.
2019 jyldyń qańtar-tamyz aılarynda óńirde 35,9 mlrd. teńgeniń aýyl sharýashylyǵy ónimi óndirilip, bul ótken jyldyń sáıkes kezeńimen salystyrǵanda 2,7%-ǵa artyq.
2019 jyldyń 8 aıynda tamaq ónimderin óńdeý kólemi 25,8 mlrd.teńgeni qurap, ótken jyldyń osy kezeńimen salystyrǵanda 8,8%-ǵa artty.
Aýyl sharýashylyǵynyń negizgi qoryna salynǵan ınvestıtsııalar kólemi 2 094,5 mln. teńgeni qurap, ótken jyldyń osy kezeńimen salystyrǵanda 2,2 esege artty.
Tamaq ónimderin óndirýdegi negizgi kapıtalǵa 583,8 mln teńge ınvestıtsııa salynyp, ótken jyldyń sáıkes kezeńimen salystyrǵanda 2,3 esege artty.
Esepti kezeńde oblys boıynsha 340,7 myń bas múıizdi iri qara, 738,6 myń bas qoı men eshki, 143,6 myń bas jylqy, 50,5 myń bas túıe, 2,7 myń bas shoshqa jáne 124,1 myń bas qus ósirilýde.
Ótken jyldyń tıisti kezeńimen salystyrǵanda múıizdi iri qara 6,7 %-ǵa, qoı men eshki 9,4%-ǵa, jylqy 12,6%-ǵa, túıeniń sany 6,7 %-ǵa, shoshqa 45,4%-ǵa artty.
Agrarlyq sektorǵa kórsetilgen memlekettik qoldaýǵa ústimizdegi jyly 13,3 mlrd teńge bólinip, ótken jylmen salystyrǵanda 28%-ǵa artty. Azyq-túlik taýarlarynyń baǵalarynyń ındeksi 105,6% qurady.
Oblys boıynsha 183,1 myń gektar jerge egis egildi. Onyń ishinde dándi daqyldar 97,5 myń ga, maıly daqyldar 7,9 myń ga, mal azyqtyq daqyldar 60,2 myń ga, kartop, kókónis, baqsha 17,4 myń ga. Negizgi daqyl kúrishtiń kólemi — 87,9 myń ga.
Aýyl sharýashylyǵy daqyldary ótken jylmen salystyrǵanda 5,8 myń gektarǵa artyq. Dándi daqyldar kólemi 2,4 myń gektarǵa, mal azyqtyq daqyldar 3,4 myń gektarǵa, kartop, kókónis jáne baqsha daqyldary 639 gektarǵa ulǵaıtyldy.
Búgingi kúni oblys boıynsha ornalasqan 87,9 myń gektar kúrishtiń 42 gektary orylyp, 165,3 myń tonna ónim alyndy. Kúrish jınaý jumystary jalǵasýda.
Oblys boıynsha erte egilgen 3,8 myń gektar kúzdik bıdaı daqyly tolyǵymen jınalyp, 9,7 myń tonna ónim alynsa, (orta ónim gektaryna 25,6 ts), 4,1 myń gektar jazdyq bıdaıdan 4,5 myń tonna ónim (orta ónim gektaryna 11,1 ts), 527 gektar jazdyq arpadan barlyǵy 440,4 tonna ónim (orta ónim gektaryna 8,4 ts) jáne 63 gektar sulydan 45,4 tonna ónim alyndy (orta ónim gektaryna 7,2 ts).
Sonymen qatar, búgingi tańda dándik júgeri men tary daqyldaryn jınaý jumystary bastalyp, egilgen dándik júgeriniń 521 gektary (83,2%), tarynyń 194 gektary (38,1%) jınalyp, tıisinshe 1757 tonna júgeri, 529 tonna tary alyndy.
Oǵan qosa, kartop, kókónis jáne baqsha daqyldaryn jınaý jumystary bastaldy. Búgingi kúni, 3,9 myń gektar kartoptyń 2,8 myń gektary (70,1%), 5,6 myń gektar kókónistiń 4,9 myń gektary (86,3%) jáne 7,7 myń gektar baqshanyń 6,6 myń gektary (84,2%) jınaldy.
Maqsary daqylyn jınaý jumystary tolyǵymen aıaqtaldy. Búgingi kúni 7,7 myń gektar (100%) jınalyp, 7 myń tonna ónim alyndy.
Sonymen qatar, eski jońyshqanyń І-shi jáne II-shi orymy aıaqtalyp, I-shi orymnan 87,1 myń tonna, II-shi orymnan 88,9 myń tonna jońyshqa shóbi jınaldy. 17632 jańa jońyshqanyń orylǵan 13819 gektarynan 11,7 myń tonna shóp jınalyp otyr.
Oblystyń eńbek ónimdiligin arttyryp, sapaly et ónimderiniń kólemin jáne sapasyn arttyrý maqsatynda ústimizdegi jyly Qyzylorda qalasynan «Syr marjany» JShS bazasynda et kombınatynyń qurylysy júrgizilýde. Kásiporyn Ózbekstan memleketine 250 bas (tirideı salmaǵy 105 tonna) iri qara maldy, Iran Respýblıkasyna 56 bas (tirideı salmaǵy 22,4 tonna) iri qara maldy eksporttady. «Shaǵan jer» JShS jáne «Syr marjany» JShS Ózbekstan Respýblıkasynyń «MUXTOR-TRADE» ShQB-men 1000 bas iri qara maldy tirileı jetkizý boıynsha kelisimshartqa otyrdy. Sonymen birge, Iranǵa - 800 bas, Birikken Arab Ámirligine 950 bas tirileı qozy eksportqa jóneltildi.
Tamaq ónimderin óńdeý kólemi 2019 jylǵy qańtar-tamyz aılarynda ótken jyldyń osy kezeńimen salystyrǵanda 8,8%-ǵa artty.
Sondaı-aq, kúrish 5,9%-ǵa, sút - 2,1 esege, irimshik 1,4 esege, ózge de sút ónimderi 2,8%-ǵa artqan.
2018 jyly oblystan $34,5 mln quraıtyn 95,8 myń tonna aýyl sharýashylyǵy ónimderi eksporttaldy. 2017 jylmen salystyrǵanda ósim 18,2 % qurady. Onyń ishinde, óńdelgen aýyl sharýashylyǵy ónimderiniń úlesi 94,5% qurap otyr.
Jalpy eksporttalǵan ónimniń negizgi ótkizý naryqtary Tájikstan (34,6%), Reseı Federatsııasy (32,7%), Ýkraına (9,1%), Ózbekstan memleketi (9%) jáne Ázerbaıjan (7,5%) bolyp otyr. 2019 jyldyń 1 tamyzyndaǵy málimetterge sáıkes, oblystan $18 608,3 myń quraıtyn 44 533,8 tonna aýyl sharýashylyǵy ónimderi eksporttalyp, ótken jyldyń sáıkes kezeńimen salystyrǵanda 93,6 paıyzdy qurap otyr.
2013 jyly eksportqa 3 túrli ónim shyǵarylsa (balyq, kúrish, astyq qaldyǵy), búgingi kúnge onyń sany 19-ǵa ulǵaıtyldy (qaýyn, qarbyz, qııar, arpa, maqsary maıy, kartop, tomat, iri qara mal t.b.). Budan bólek, Qytaı memleketine 20 tonna jún eksporttaldy. Jyl sońyna deıin Iran memleketine 150 bas iri qara mal, BAÁ-ne 1000 bas iri qara mal jáne 200 bas qoı, sondaı-aq baqsha daqyldaryn eksporttaý josparlanýda.
Osy jyldyń 8 aıynyń qorytyndysy boıynsha ınvestıtsııalar kólemi 1,7 esege artty
2019 jylǵy qańtar-tamyzda óńirge tartylǵan jalpy ınvestıtsııa kólemi 233,4 mlrd teńge qurap, ótken jyldyń esepti kezeńimen salystyrǵanda 1,7 ese ósti. Ósý dınamıkasy boıynsha Qyzylorda oblysy aımaqtar qatarynda alǵashqy úshtikke kiretinin atap ótken jón (Qaraǵandy – 188,3%, Shyǵys Qazaqstan – 145,9%).
Investıtsııalardyń ósýi negizinen ınfraqurylymdyq (51 mlrd.tg.), ınvestıtsııalyq (79 mlrd.tg.) jobalarǵa jáne munaı kompanııalary men basqa da salalarǵa tartylǵan ınvestıtsııalar esebinen qamtamasyz etildi.
Oblys aýmaǵynda 909,9 ga jer kóleminde 6 ındýstrııalyq aımaq jumys jasaýda. Qazirgi tańda bólingen jer teliminen 213,8 ga jer ıgerilip, jalpy quny 193 mlrd.tengeni quraıtyn 47 joba ornalastyryldy.
Búgingi kúni quny 65,3 mlrd teńge quraıtyn 21 joba iske asyrylyp, 422 jumys oryny ashyldy.
2019 jyldyń 8 aıynda iske qosylǵan jobalardyń shyǵarǵan ónim kólemi 2,6 mlrd tengeni qurap, 2018 jyldyń uqsas kezeńimen salystyrǵanda 8,9 esege ósti.
Jyl basynan beri, jalpy quny 166 mln teńgeni quraıtyn, 5 joba iske qosyldy. Jobalar óndiristik qýattylyǵyna tolyq shyqqanda 26 jańa jumys oryny qurylatyn bolady.
2019 jyldyń 8 aıynda ónerkásiptik ónim óndirisiniń kólemi 588 mlrd teńgeni qurady.
Bıyl ındýstrııalandyrý baǵdarlamasynyń ekinshi besjyldyǵynyń aıasynda oblysta 431 jumys ornyn qurýmen quny 42,6 mlrd teńne bolatyn 4 jobany iske asyrý josparlanǵan. Olar - tabaq shyny óndiretin jáne óńdeıtin, kúıdirilgen kirpish shyǵaratyn, balyqty tereń óńdeıtin zaýyt qurylysy, plastık qaıyqtar óndiretin jáne kúrish óńdep, mal azyǵyn shyǵarýdy uıymdastyratyn tsehtar salý. 2019 jyldyń ІІ jartyjyldyǵynda paıdalanýǵa berý josparlanǵan.
Sondaı-aq, 2018 jyl ótken Qazaqstan men Reseı óńiraralyq yntymaqtastyǵynyń XV forýmy aıasynda Elbasynyń «Baıqońyr» erkin ekonomıkalyq aımaǵyn qurý máselesin pysyqtaý týraly tapsyrmasyna sáıkes «Baıqońyr» erkin ekonomıkalyq aımaǵyn qurý boıynsha tıisti jumystar atqarylýda.
Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» EEA qurý týraly Kelisim jobasy ázirlendi.
«Baıqońyr» EEA «Baıqońyr» Halyqaralyq ǵarysh aılaǵyn (2019-2030 jj.), «Baıqońyr» oıyn-saýyq týrıstik aımaǵyn (2019-2026 jj.) qurýǵa, Baıqońyr qalasynda 10-nan astam iri eksportqa baǵdarlanǵan ónerkásiptik óndiristerdi uıymdastyrý úshin sheteldik jáne otandyq ınvestorlardy tartýǵa múmkindik beredi. Sonymen qosa, «Baıqońyr» EEA qalada qolaıly bıznes ahýal týdyrady, atap aıtqanda, 3,6 myń jańa jumys ornyn qurýǵa, jumyssyzdyqtyń 2019 jylǵy 4,6%-dan 2025 jylǵa qaraı 2,5%-ǵa deıin tómendeýine, ekonomıkada jumyspen tartylǵandar sanyn 2019 jylǵy 28 myń adamnan 2035 jyly 45 myń adamǵa deıin arttyrýǵa, sondaı-aq týrıstik aǵymdy jylyna 250-500 myńǵa deıin ulǵaıtýǵa yqpal etedi.
EEA aýmaǵynda 3600-den asa jumys ornyn qurýmen jalpy quny 466 mlrd teńge bolatyn 10 jobany salý josparlanǵan. Baıqońyr qalasynda búginde 77387 adam turady. Qalada 347 kóppáterli úı, ıaǵnı 20 myńǵa jýyq páter bar. Turǵyn úı máselesin sheshý úshin bıyl bes turǵyn úıdiń qurylysy aıaqtaldy.
Qyzylorda oblysynyń Qurylys, sáýlet jáne qala qurylysy basqarmasynyń bastyǵy Arnur Nurmaǵambetov aıtqandaı, 2018 jyly «Nurly jer» baǵdarlamasy aıasynda Baıqońyr qalasynda 5 turǵyn úı qurylysy bastaldy, olarda páterler sany 250. 2018 jyldyń sońynda olar paıdalanýǵa berildi. Bıyl osy úılerge barlyq qajetti ınfraqurylym júrgizildi, abattandyrý boıynsha jumystar tolyq aıaqtaldy.
«Jýyrda bul úılerde 50 páter memlekettik qyzmetkerlerge, bıýdjet salasynyń, quqyq qorǵaý júıesiniń jumyskerlerine qyzmettik baspana retinde beriletin bolady. Qalǵan 200 páter satyp alý quqyǵynsyz jalǵa beriletin turǵyn úı baǵyty boıynsha Baıqońyr ákimdiginde turǵyn úı kezeginde turǵan azamattarǵa beriledi. Bul úılerdi salýǵa respýblıkalyq jáne oblystyq bıýdjetterden 2,1 mlrd teńge bólinedi. Sonymen qatar áleýmettik ınfraqurylym nysandary: mektepter, aýrýhanalar men emhanalar salyndy», — dedi A.Nurmaǵanbetov.
Óz kezeginde Qyzylorda oblysynyń Energetıka jáne turǵyn úı-kommýnaldyq sharýashylyǵy basqarmasynyń bastyǵy Medet Ýsaın 2017 jyly «QazTransGazAımaq» AQ ınvestıtsııalyq baǵdarlamasy aıasynda Baıqoǵyr qalasyna gaz tartylǵanyn aıtty. 44 km gaz qubyry men gaz taratý stantsııalarynyń qurylysy júrgizildi.
«Besinshi vedomstvoaralyq komıssııasynyń nátıjeleri boıynsha búgingi tańda »QazTransGazAımaq« AQ Baıqońyr qalasynda Qyzylorda oblysynń tarıfterine sáıkes gaz satý múmkindigine ıe boldy. Buryn Baıqońyr turǵyndary suıyq munaı gazyn paıdalanyp, bir páter úshin orta eseppen aıyna 3 myń teńge tóleıtin. Gaz qubyryn júrgizgennen keıin tólemi aıyna shamamen 200 teńgeni quraıdy. Bul halyq úshin aıtarlyqtaı demeý bolady, al shaǵyn jáne orta bıznes úshin damýǵa serpin bermek. Búginde 6 áleýmettik nysan jáne barlyq 323 kóppáterli turǵyn úı tabıǵı gazǵa kóshirilgen», — dedi M. Ýsaın.
Bıylǵy 8 aıda qurylys jumystarynyń kólemi 97,4 mlrd tg nemese 2018 jyldyń sáıkes kezeńiniń 248,8% qurady
2019 jylǵa «Nurly jer» turǵyn úı qurylysy memlekettik baǵdarlamasy aıasynda 22,2 mlrd teńge bólindi. Jalpy memlekettik baǵdarlama aıasynda barlyq qarjylandyrý kózderi esebinen 1862 páterdi quraıtyn 43 kópqabatty turǵyn úıdiń (110,9 m.sh.m.) qurylysyn júrgizý josparlanǵan. Onyń ishinde: satyp alý quqyǵynsyz jalǵa beriletin turǵyn úıler boıynsha – 24 úı (946 páter – 53,2 m.sh.m.), kredıttik turǵyn úı – 17 úı (830 páter – 52,4 myń sh.m.), jeke qurylys salýshylar esebinen – 2 úı (86 páter – 5,3 myń sh.m.).
Sondaı-aq, baǵdarlama aıasynda ınjenerlik-kommýnıkatsııalyq ınfraqurylymdy damytý boıynsha 35 jobanyń qurylysyn júrgizýge 9,5 mlrd tg bólindi.
Jalpy 2019 jyly barlyq qarjylandyrý kózderinen 720,8 myń sh. m. turǵyn úıdi paıdalanýǵa berý jáne 299 shaqyrym ınjenerlik ınfraqurylym jelilerin júrgizý josparlanǵan.
«7-20-25. Árbir otbasyna baspana alýdyń jańa múmkindikterin berý» ıpotekalyq turǵyn úıdi kredıtteý baǵdarlamasy sheńberinde búginde ekinshi deńgeıli bankter arqyly 1 422,1 mln teńge somasyna 166 ótinish túsip, 747,5 mln teńgege 87 nesıe berildi. «7-20-25» baǵdarlamasy boıynsha ótken jyly 240 páterli 4 kredıttik turǵyn úıdiń qurylysy bastalǵan. Sondaı-aq, aǵymdaǵy jyly qurylysy bastalǵan 590 páterli 13 kredıttik turǵyn úı baǵdarlama sheńberinde ótkiziletin bolady.
2019 jylǵy qańtar–tamyz aralyǵynda óńirde 9 myńǵa jýyq jańa jumys orny qurylǵan
Statıstıka málimetterine sáıkes Qyzylorda oblysy boıynsha 2019 jyldyń І toqsanyndaǵy jaǵdaı boıynsha jumys kúshiniń sany – 347,9 myń adam (2018 j.1 t. – 344,7 myń adam), jumyspen qamtylǵan halyq sany – 331,4 myń adam (2018 j.1 t. – 328,1 myń adam).
Jalpy jumyssyzdyq deńgeıi 4,8% quraıdy. Esepti kezeńde 8721 (70,9%) jańa jumys orny quryldy, 8095 – turaqty (65,8 %).
«Eńbek» nátıjeli jumyspen qamtý jáne jappaı kásipkerlikti damytý» baǵdarlamasyn júzege asyrýǵa oblysqa 10,2 mlrd teńge qaralǵan. Tehnıkalyq jáne kásiptik bilimi bar kadrlardy daıarlaýǵa – 1515 adam joldandy, qysqa merzimdi oqýǵa 1067 adam joldandy. «Bastaý Bıznes» jobasy boıynsha kásipkerlik negizderine oqytýǵa 825 adam baǵyttaldy, 757-i oqýdy aıaqtap, 141-i shaǵyn nesıe, 309-y – memlekettik grant aldy.
Aýyldaǵy jáne qalalardaǵy kásipkerlik bastamalardy qoldaý maqsatynda 598 adamǵa shaǵyn nesıe berildi. Qosymsha 467 turaqty jańa jumys oryndary ashyldy.
Jańa bıznes-ıdeıalardy iske asyrýǵa 1137,2 mln tg somasyna 2637 grant berildi, 757 adam grant alyp, jeke isterin ashty.
Jumyspen qamtýdyń belsendi sharalarymen 17295 adam qamtyldy: bos jumys oryndaryna ornalasqan – 8337 adam; áleýmettik jumys oryndaryna – 1039 adam, jastar tájirıbesine – 2508 adam, qoǵamdyq jumystarǵa – 5411 adam.
Oblys boıynsha ataýly áleýmettik kómek alýshylar sany 3,7 esege (34312 adamnan 129525 adamǵa) artty. Jergilikti ókiletti organdardyń sheshimimen jekelegen sanattaǵy 8126 adamǵa 650,5 mln teńgege áleýmettik tólem tólendi. 2906 otbasyna 127 mıllıon teńgeden astam somaǵa qaıyrymdylyq kómek kórsetildi.
Óńirde ShOB sýbektileriniń sany shamamen 8%-ǵa artty
Jumys jasap turǵan shaǵyn jáne orta kásipkerlik sýbektileriniń sany 2019 jyldyń 8 aıynda 44 227 birlikti qurady. Ósim 2018 jyldyń sáıkesti kezeńimen salystyrǵanda 7,9% qurady. Jalpy oblys boıynsha tirkelgen shaǵyn jáne orta bıznes sýbektileriniń ishindegi jumys jasap turǵandardyń úlesi 85,7% boldy.
2019 jyldyń birinshi toqsanynda oblysta shaǵyn jáne orta bıznes salasynda 90 020 adam jumyspen qamtylyp, 70,9 mlrd teńgeniń ónimi óndirildi.
Jyl basynan beri 3970 jumyssyz, ózin-ózi jumyspen qamtýshy memlekettik baǵdarlamalar aıasynda kásipkerlik negizderine oqytyldy. «Bıznestiń jol kartasy 2020» memlekettik baǵdarlamasyna qoldaý kórsetý úshin 1 mlrd 150 mln teńge bólindi. Jyl basynan beri ekinshi deńgeıli banktermen jalpy quny 3,8 mlrd teńgeni quraıtyn 112 joba maquldandy.
Oblystyń barlyq medıtsınalyq uıymynda 100% medıtsınalyq aqparattyq júıeler engizilgen
Osy jyldyń sońyna deıin qosymsha 26 ýchaske ashyp, 1 jalpy tájirıbe dárigerine shaqqandaǵy halyq sanyn 1600 adamǵa jetkizý josparlanýda.
14 alǵashqy medıtsınalyq-sanıtarlyq kómek uıymynda jedel medıtsınalyq kómek bólimsheleri ashyldy. 30 jańa jedel járdem brıgadasynyń ashylýymen olardyń sany 2017 jylmen salystyrǵanda 47-den 77-ge deıin ósti. Sonyń nátıjesinde jol júrýdiń ortasha ýaqyty qońyraý ýaqytynan bastap 9,8-den 6,9 mınýtqa deıin qysqardy, sátti reanımatsııa kórsetkishi 13-ten 48%-ǵa deıin jetkizildi.
Búgingi tańda AMSK dárigerlerimen qamtý 95% jetti, orta medıtsınalyq qyzmetkerlerdiń dárigerge qatynasy 1:3-ke deıin jetkizildi.
Densaýlyq saqtaý salasyn tsıfrlandyrý aıasynda oblystyń barlyq medıtsınalyq uıymdarynda 100% medıtsınalyq aqparattyq júıeler engizilgen. Kompıýterlik tehnıkamen jabdyqtaý 100% qurady. Internetke qol jetimdilik 86% quraıdy, onyń ishinde qalalyq jáne aýdandyq medıtsınalyq mekemeler deńgeıinde — 100%.
MÁMS týraly oblys turǵyndaryna aqparattyq-túsindirý jumystaryn júrgizý aıasynda 108 905 dana aqparattyq materıaldar daıyndalyp, taratyldy (49 800 býklet, 49 715 paraqsha, 9400 flaer).
Sonymen qatar, WhatsApp messendjeri arqyly 40 000 abonentke MÁMS júıesi týraly beınerolıkter, sonymen qatar 70 000 abonentke SMS habarlama jiberildi.
Mindetti áleýmettik medıtsınalyq saqtandyrý júıesine kóshýdi júzege asyrý maqsatynda (ásirese aýyl turǵyndary arasynda) oblystyń eldi mekenderinde medıtsınalyq uıymdardyń qyzmetkerlerimen jáne Qyzylorda oblysy boıynsha «ÁMSQ» KEAQ birlese otyryp, 544 286 adamdy qamtyǵan túsindirý jumystary júrgizildi.Júrgizilgen jumystardyń nátıjesinde Áleýmettik medıtsınalyq saqtandyrý qoryna 5 mlrd teńge kóleminde tólemder jasaldy.
Aýlany aralaý (turǵylyqty jeri boıynsha) qorytyndysy boıynsha azamattardyń mártebesin ózektendirý jumystarynyń nátıjeleri boıynsha búginde josparda kózdelgen 113 351 adamnyń 86 072-si ózektendirildi, bul 75,9% qurady, onyń ishinde 44 314 — jaldamaly jumysshylar, 1274-i — jumyssyzdar, 5002-i — tirkelmegen jumyssyzdar, ózin-ózi jumyspen qamtyǵandar — 466, jeke kásipker — 690, áleýmettik tólem alýshylar — 5854 adam.
Oblys mektepteriniń 100% keń jolaqty ınternetke qosylǵan
Oblystaǵy 667 mektepke deıingi bilim berý uıymdarynda 61050 bala tárbıelenýde. Bıyl 9 bilim berý nysanynyń qurylys jumystary júrgizilip jatyr. 8 aıdyń qorytyndysy boıynsha Aral aýdany, Sekseýil kentindegi mekteptiń 100 oryndyq qosymsha qurylysy jańa oqý jylynda paıdalanýǵa berildi.
3 pen 6 jastaǵy balalardyń qamtylýy 100%. Aral, Qazaly aýdandarynan 85 orynǵa arnalǵan 2 jeke balabaqsha, Qyzylorda qalasynan 140 orynǵa arnalǵan 1 memlekettik balabaqsha ashyldy. Jekemenshik balabaqshalardyń úlesi barlyq balabaqshanyń 72% quraıdy. 2019-2020 oqý jylynda 293 mektepte 162 684 oqýshy bilim alýda.
2019 jyldyń 1 maýsymnan bastap 1 synypqa qabyldaý protsesi avtomattandyrylǵan júıege qosyldy. Barlyq oqýshylar mektepterge tolyq ornalasty. Oqý protsesi 1-2 aýysymda júrgizilýde. Jańartylǵan bilim berý mazmunyna kóshken 4, 9, 10 synyp oqýshylary oqýlyqtarmen tolyq qamtamasyz etildi.
Kásiptik-tehnıkalyq bilim berý týraly aıtar bolsaq, 2019-2020 oqý jylynda oblys boıynsha 29 tehnıkalyq jáne kásiptik bilim beretin oqý oryndarynda 97 mamandyq 167 biliktilik boıynsha 20985 stýdent bilim alýda (16 memlekettik, 13 jekemenshik oqý oryndary).
2019 jyly kolledjderdi 5398 stýdent oqýyn aıaqtasa, onyń ishinde 3598 memlekettik tapsyrys negizinde bilim alǵandar. Sonymen birge, oblys boıynsha 10 oqý oryny ınstıtýtsıonaldy jáne mamandandyrylǵan akkredıtatsııadan sátti ótse, 8 oqý oryny joǵary kolledj statýsyn ıelenip, qoldanbaly bakalavr mamandaryn daıarlaýdy júzege asyrýda. 293 mektep nemese 100% keń jolaqty ınternetke qosylǵan.
Bıylǵy 8 aıda óńirde 28 týrıstik nysan paıdalanýǵa berildi
2019 jyldyń I jarty jyldyǵynyń qorytyndysy boıynsha kelýshilerdiń sany 44,3%-ǵa jáne ishki týrızmge kelýshilerdiń sany ótken jyldyń sáıkes kezeńimen salystyrǵanda 45,6%-ǵa artyp, tıisinshe 1 605 adamdy jáne 37 633 adamdy qurady.
Oblysta 109 ornalastyrý orny bar, ortasha quny 7 801 teńgeni quraıtyn 1 411 nómir, birjolǵy syıymdylyǵy 3 374 tósek-oryndy quraıdy. Kórsetilgen kezeńde 39 237 adamǵa 533,2 mln teńge somasyna qyzmet kórsetildi.
Budan ózge, oblysta «Batys Eýropa – Batys Qytaı» avtomagıstraliniń boıyndaǵy jol boıyndaǵy servıs nysandaryn damytý boıynsha jumystar jalǵasýda. Qyzylorda oblysynyń bóliginde nysandardyń qurylysyna arnalǵan 44 núkte anyqtaldy. 2019 jylǵy 10 qyrkúıegindegi jaǵdaıy boıynsha ınvestıtsııanyń jalpy somasy 6 mlrd 161 mln teńgeni quraıtyn 28 nysan paıdalanýǵa berildi (onyń ishinde 14-i ınternetke qosylǵan, POS-termınaldarmen tóleý múmkindigi bar). 720 turaqty jumys orny quryldy. Qoldanystaǵy 28 nysannyń 17-si «Google maps» jáne «Yandex karta» júıesine engizildi.