Qańtar-shildede 8,6 mln sharshy metr turǵyn úı paıdalanýǵa berildi
Onyń atap ótýinshe, osy jyldyń 8 aıynda óńdeý ónerkásibinde oń nátıje saqtalyp otyr. Óndiris kólemi 3 paıyzǵa artqan. Kórsetkishtiń ósýi 14 óńirde tirkeldi. Sonyń ishinde eń joǵary ósim Qostanaı, Batys Qazaqstan, Abaı oblystary jáne Almaty qalasynda baıqaldy. Óńdeý ónerkásibi salalary boıynsha mashına jasaý óndirisi 28,7, onyń ishinde avtomobıl jasaý 43,3 jáne elektr jabdyqtaryn jasaý 34,4 paıyzǵa artty.
«Sondaı-aq ósý myna salalarda baıqalyp otyr: azyq-túlik óndirisi – 4,5, hımııa ónerkásibi – 4,1, metall buıymdary – 8,1, sýsyndar óndirisi – 6,4, plastmassa buıymdary – 8, jeńil ónerkásibi – 21. Taý-ken ónerkásibindegi óndiris kólemi 3,8 paıyzǵa joǵarylady. Bul rette munaı óndirý – 5,6, gaz óndirý – 2,5, ózge de paıdaly qazbalardy óndirý – 14,2, taý-ken ónerkásibinde qyzmet kórsetý 2,4 paıyzǵa ósti», - dedi mınıstr.
Onyń dereginshe, metall kenderin óndirý – 0,5, kómir óndirý 6 paıyzǵa tómendedi.
«Oryndalǵan qurylys jumystarynyń kólemi 12,2 paıyzǵa ulǵaıdy. 17 óńirde ósim bar, ásirese qurylys-montajdaý jumystaryndaǵy joǵary kórsetkish Jetisý, Batys Qazaqstan, Qyzylorda jáne Abaı oblystarynda baıqaldy», - dedi Álibek Qýantyrov.
Mınıstrdiń aıtýynsha, qańtar-shildede 8,6 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 11,7 paıyzǵa joǵary. Turǵyn úıdi paıdalanýǵa berýdiń eń joǵary kórsetkishteri Ulytaý jáne Abaı oblystarynda, sondaı-aq Almaty jáne Astana qalalarynda baıqaldy.
«Aýyl sharýashylyǵynyń jalpy shyǵarylymy 2,6 paıyzǵa ulǵaıdy. 16 óńirde saladaǵy oń ózgeris anyqtaldy. Eń joǵary ósimdi Mańǵystaý, Shyǵys Qazaqstan, Aqmola jáne Pavlodar oblystary kórsetti. 7 ekonomıkalyq kórsetkish boıynsha óńirler arasyndaǵy jalpy jaǵdaı mynadaı: barlyq kórsetkish boıynsha ósim 6 óńirde – Abaı, Aqmola, Batys Qazaqstan, Qostanaı, Soltústik Qazaqstan oblystarynda, sondaı-aq Almaty qalasynda baıqaldy», - dedi ol.
