Qańtar-shildede 1 jasqa tolmaı shetinegen náresteler sany ótken jylmen salystyrǵanda 1,5 paıyzǵa azaıdy
ASTANA. 14 qyrkúıek. QazAqparat - Bıylǵy qańtar-shildede elimizde ólim-jitim sany 85,7 myń adamdy qurady.
Bul ótken jyldyń sáıkes kezeńine qaraǵanda, 1,4 paıyzǵa tómen. Osy jaıynda búgin Astanada ótken brıfıngte QR Statıstıka agenttiginiń tóraǵasy Álıhan Smaıylov málim etti.
Statıstıka agenttiginiń málimetterine qaraǵanda, bıylǵy qańtar-shildede respýblıkada 1 jasqa deıingi 3231 náreste ólimi tirkeldi. Ótken jyldyń sáıkes kezeńimen salystyrǵanda 1 jasqa deıin shetinegen náresteler sany 1,5 paıyzǵa azaıdy.
Atap aıtqanda, náreste óliminiń negizgi sebebi perınataldyq kezeńde paıda bolatyn jaǵdaılar bolyp tabylady. Bıylǵy atalǵan kezeńde odan 1915 náreste ólgen. Týa bitken aýytqýlardan shetinegender sany - 624, tynys organdary aýrýlarynan - 222 jáne jazataıym jaǵdaıdan, ýlanýdan jáne jaraqattan kóz jumǵandardyń sany 130-dy qurady.
