Qańtar-sáýirde syrtqy saýda 36,5 mlrd. dollardy qurap, byltyrmen salystyrǵanda 41 paıyzǵa ósti
ASTANA. 13 maýsym. QazAqparat /Qanat Mámetqazyuly/ - 2011 jylǵy qańtar-sáýirde syrtqy saýda aınalymy (QR Kedendik baqylaý komıtetiniń derekteri, uıymdaspaǵan saýda esebinsiz) 36581,2 mln. AQSh dollaryn qurady. Bul 2010 jylǵy qańtar-sáýirmen salystyrǵanda 41 paıyzǵa artyq kórsetkish.
Bul týraly QazAqparat QR Statıstıka agenttiginiń baspasóz qyzmetine silteme jasap habarlaıdy.
Agenttiktiń málimetinshe, 2011 jylǵy syrtqy saýdanyń ishinde eksport - 26929,3 mln. AQSh dollaryn (47,3 paıyzdyq ósim), ımport - 9651,9 mln. AQSh dollaryn quraǵan (26 paıyzdyq ósim). Budan bólek, 2011 jylǵy qańtar-mamyrda negizgi kapıtalǵa salynǵan ınvestıtsııalar kólemi 1381,5 mlrd. teńgeni quraǵan, bul ótken jylǵy sáıkes kezeńge qaraǵanda 6,0 paıyzǵa artyq. Al tirkelgen zańdy tulǵalar sany 2011 jylǵy 1 maýsymda 292357 birlikti qurap, ótken jylǵy sáıkes kezeńmen salystyrǵanda 4,6 paıyzǵa azaıǵan. Bul negizinen salyq organdary zańdy tulǵalardy májbirlep taratýyna baılanysty rpyn alǵan kórsetkish.
«Sáıkesinshe ótken jylǵy tıisti kezeńmen salystyrǵanda tirkelgen shaǵyn bıznes sýbektileriniń (zańdy tulǵalar) sany- 4,8 paıyzǵa azaıyp, 210235 birlikti qurady. Belsendi zańdy tulǵalar sany dál osy kezeńge -3,6 paıyzǵa ósti, al belsendi shaǵyn bıznes sýbektileri (zańdy tulǵalar) - 7,5 paıyzǵa artyp, sáıkesinshe 117813 jáne 68541 birlikti qurady. Tutyný baǵalarynyń ındeksi 2011 jylǵy mamyrda 2010 jylǵy jeltoqsanmen salystyrǵanda 104,8 paıyzdy qurady. Bul rette azyq-túlik taýarlaryna baǵalar 7,8 paıyz, azyq-túlik emes taýarlar - 1,8 paıyzǵa, aqyly qyzmetter kórsetýge - 3,9 paıyzǵa artty. Ónerkásip ónimin óndirýshi kásiporyndar baǵalary 2011 jylǵy mamyrda 2010 jylǵy jeltoqsanmen salystyrǵanda 24,9 paıyzǵa ósti», - delingen agenttiktiń taratqan baspasóz aıǵaǵynda.
