Qańtar-sáýirde Nur-Sultan bıýdjetiniń kirisi 78 mlrd teńgege jýyqtady

NUR-SULTAN. QazAqparat - Bıylǵy jyldyń qańtar-sáýirinde Nur-Sultan qalasy bıýdjetiniń kirisi 78 mlrd teńgege jýyqtady. Bul týraly búgin qalalyq strategııalyq jáne bıýdjettik josparlaý basqarmasy basshysynyń mindetin atqarýshy Aıjan Túgelbaeva aıtty, dep habarlaıdy QazAqparat tilshisi.

Qalalyq qoǵamdyq keńes otyrysynda baıandama jasaǵan onyń aıtýynsha, 2019 jyldyń 1 mamyrynda memlekettik bıýdjet túsimderi boıynsha jospardyń kiris bóligi 102 paıyzǵa oryndalǵan. Boljam boıynsha memlekettik bıýdjetke 380 439,2 mln teńge túsýi tıis edi. Al túsim 388 125,2 mln teńge boldy jáne bul 2018 jylǵy deńgeıden 19 paıyzǵa artyq.

«Nur-Sultan qalasy bıýdjetiniń menshikti kirisiniń túsim kólemi 2019 jyldyń qańtar-sáýirinde 77 mlrd 981 mln teńgeni qurap, ótken jyldyń 4 aıyndaǵy kólemmen salystyrǵanda 9,8 paıyz ósim kórsetti. Onyń ishinde salyq túsimderi 7 paıyzǵa artyp, 73 mlrd 067 mln teńge boldy. Menshikti kiris túsimderi boıynsha jospar 100,8 paıyzǵa oryndaldy», - dedi ol.

Onyń dereginshe, esepten kezeńde salyqtyq emes túsimder 2 mlrd 240 mln teńgege jetken. Bul 2018 jyldyń qańtar-sáýirimen salystyrǵanda 42,7 paıyzǵa joǵary.

«Negizgi kapıtaldy satýdan túsken túsim 2 mlrd 676,2 teńgeni qurady. Bul rette jospar 1 mlrd 834,7 mln teńge bolǵan edi. Jospardyń artyǵymen oryndalýyna jer aýktsıondar men páterler satý boıynsha kelisimsharttardyń belsendi jasalýy sebep», - dedi A.Túgelbaeva.