Qańtar-sáýir aılarynda respýblıkada 3 myńnan astam esirtki qylmysy anyqtaldy - ІІM
ASTANA. Maýsymnyń 24-i. QazAqparat /Gúlmıra Álıakparova/ - Aǵymdaǵy jyldyń ótken tórt aıynda 3 myńnan astam esirtki qylmysy anyqtaldy, bul ótken jylǵa qaraǵanda 35,3 paıyzǵa kóp.
Búgin Astanada «Memlekettik organdar men úkimettiń emes sektorlardyń nashaqorlyqtyń aldyn alý jáne saýyqtyrý máselesindegi sabaqtastyǵy jáne ózara áreket etýi» taqyrybynda dóńgelek ústel ótti.
Dóńgelek ústel jumysyna qatysqan QR Іshki ister mınıstrligi Esirtki bıznesine qarsy kúres komıtetiniń tóraǵasy Janat Súleımenov atap kórsetkendeı, respýblıkada esirtkilik zattardy tárkileý kórsetkishteri jyl saıyn artyp keledi. «Kóbinese olar marıhýana sekildi kannabıs tobyna jatatyn esirtkiler», - deıdi ol.
Máselen, 2010 jyldyń tórt aıynda ishki ister organdary 3 myńnan astam esirtki qylmysyn anyqtady (2009 jyly - 2781), onyń ishinde 1 myńnan astam fakti esirtki saýdasyna qatysty bolǵan. Kórsetkish 2009 jyldyń sáıkes kezeńimen salystyrǵanda 35 paıyzǵa artyp otyr.
Sondaı-aq osy kezeń ishinde, esirtki kontrabandasyna qatysty 39 qylmystyń joly kesildi. Zańsyz aınalymnan barlyǵy 1 tonnadan astam esirtki tárkilendi (2009 - 3 tonna 206 keli). Onyń 35 kelige jýyǵy - geroın men apıyn. Tárkilengen esirtkilerdiń «qara naryqtaǵy» baǵasy jobamen 270 mln. teńgeni quraıdy.
«2009-2011 jyldarǵa qabyldanǵan memlekettik baǵdarlamaǵa (red. - Nashaqorlyq pen esirtki bıznesine qarsy kúres) sáıkes, eldiń ońtústik shekaralaryn bekitýge jáne jalpy nashaqorlyq pen esirtki bıznesimen kúreske 40 mıllıardqa jýyq teńge bólindi. Keden odaǵynyń qurylýyna baılanysty qarjynyń qomaqty úlesi ońtústik shekarany bekitýge baǵyttalýda», - dedi J.Súleımenov.
