Qańtar-sáýir aılarynda respýblıka halqynyń tabıǵı ósimi 77,1 myń adamdy qurady - Statıstıka
ASTANA. 14 maýsym. QazAqparat -Statıstıka agenttiginiń taratqan málimetterine qaraǵanda, 2012 jylǵy 1 mamyrda elimizdegi halyq sany aǵymdaǵy derekter boıynsha 16 mln. 757,0 myń adamdy qurady.
Onyń ishinde qalalyqtar - 9164,6 myń (54,7 paıyz), aýyldyqtar - 7592,4 myń adam (45,3 paıyz) qurady. Sóıtip, 2012 jyldyń basymen salystyrǵanda jalpy el boıynsha halyq sany 81,6 myń adamǵa ósip, 2011 jyldyń osy kezeńdegi ósimnen (76,6 myń adam) 6,5 paıyzǵa kóbeıdi.
Agenttik deregine súınsek, 2012 jylǵy qańtar-sáýirde respýblıka halqynyń tabıǵı ósimi 77,1 myń adamdy qurady (2011j. qańtar-sáýirde - 71,4). Tabıǵı ósimniń jalpy koeffıtsıenti 1000 halyqqa 13,9 (13,1) adamdy qurady. Aǵymdaǵy jylǵy qańtar-sáýirde AHAT organdarynda 126,4 myń (122,9 myń) týylǵandar tirkeldi. Bul 2011 jylǵy qańtar-sáýirge qaraǵanda 2,8 paıyzǵa artyq kórsetkish. 1000 adamǵa shaqqandaǵy týýdyń jalpy koeffıtsıenti 22,8 (22,6) týǵandardy qurady.
Sonymen qatar, elimizde aǵymdaǵy jylǵy qańtar-sáýir aılarynda qaıtys bolǵandar sany 49,3 myń (51,4 myń) adamdy qurady. Bul 2011 jyldyń qańtar-sáýirine qaraǵanda 4,1 paıyzǵa az. 2012 jylǵy qańtar-sáýirde respýblıkada 1 jasqa deıingi 1801 náreste shetinegeni tirkeldi (2011j. qańtar-sáýirde - 1942). 2011 jylǵy qańtar-sáýirmen salystyrǵanda 1 jasqa deıingi shetinegen náreste sany 7,3 paıyzǵa azaıdy.
Sonymen qatar, 2012 jyldyń qańtar-sáýir aılarynda AHAT organdarymen tirkelgen nekeler sany 8,2 paıyzǵa ósip, 46,2 myń (2011j yly qańtar-sáýirde - 42,7 myń) qurady. Nekeniń jalpy koeffıtsıenti 1000 turǵynǵa 8,3 (7,9) qurady. Ajyrasýlar sany da 9,4 paıyzǵa ósip, 15,1 (13,8) myń qurady, ajyrasýdyń jalpy koeffıtsıenti 1000 turǵynǵa 2,7 (2,5) qurady.
2012 jylǵy qańtar-sáýirde byltyrmen salystyrǵanda syrtqy kóshi-qon boıynsha Qazaqstanǵa kelgender sany 243 adamǵa, nemese 2,0 paıyzǵa azaıdy. Kerisinshe, Qazaqstannan ketkender sany 409 adamǵa, nemese 6,1 paıyzǵa kóbeıip, 7117 adam quraǵan.
Elimizdegi negizgi kóshi-qon almasýy negizinen TMD memleketterimen bolýda. TMD elderinen kelgender sany 9733 adam (83,7 paıyz) qurasa, al sol elderge ketkender 6727 adamǵa (94,5 paıyz) teń bolǵan. 2012 jylǵy qańtar-sáýirde el ishinde qonys aýdaratyn kóship-qonýshylar sany byltyrmen salystyrǵanda sany 4548 adamǵa nemese 3,9 paıyzǵa azaıdy.
