Qańtar oqıǵasynda jappaı tártipsizdikke qatysyp, adam tonaǵan óskemendik 5 jylǵa sottaldy

ÓSKEMEN. QazAqparat – Qańtar oqıǵasynda jappaı tártipsizdikke qatysyp, adam tonaǵan Óskemen turǵyny 5 jylǵa túrmege qamaldy, dep habarlaıdy QazAqparat tilshisi.

ShQO prokýratýrasy baspasóz qyzmetiniń málimetine súıensek, qańtar oqıǵasyna qatysyp, birneshe qylmys jasaǵan er adamǵa sot úkimi shyqty.

Belgili bolǵandaı, jappaı tártipsizdikke qatysqan aıyptalýshy adam tonaǵan. Sondaı-aq polıtsııa qyzmetkerleri ustaǵan kezde odan atys qarýy tabyldy. Osyǵan baılanysty sot isi Óskemen qalalyq sotynda qaralǵan.

«Sottalýshy QR Qylmystyq Kodeksiniń 272-baby 2-bóligi (Jappaı tártipsizdikke qatysý), 191-baby 2-bóligi 1-tarmaǵy (Adamǵa qaýipti emes kúsh qoldanamyn dep qorqytyp jasalǵan tonaý), 287-baby 1-bóligi (Atys qarýyn, oq-dárilerdi zańsyz saqtaý jáne alyp júrý) boıynsha kináli dep tanyldy. Qylmystyń sıpaty men qoǵamdyq qaýiptilik dárejesine baılanysty sot er adamdy 5 jylǵa bas bostandyǵynan aıyrdy. Úkim áli zańdy kúshine engen joq», - delingen aqparatta.