Qańtar oqıǵasynda zardap shekkenderge Bas prokýratýra usynǵan tizim boıynsha kómek kórsetiledi

NUR-SULTAN. QazAqparat – «Qazaqstan halqyna» qory qańtardaǵy jappaı tártipsizdikter kezinde zardap shekken jáne qaza tapqandardyń otbasyna kómekti Bas prokýratýra usynǵan tizim boıynsha kórsetedi. Bul týraly atalǵan qordyń basqarma tóraǵasy Bolat Jámishev málim etti, dep habarlaıdy QazAqparat tilshisi.

«Qor atynan qańtar oqıǵasynan zardap shekken 19 otbasyǵa 133 mln teńge bólindi. Sonymen qatar, jappaı tártipsizdikter kezinde qaıtys bolǵan 18 adamnyń otbasyna 126 mln teńge kóleminde qarjylaı qoldaý kórsetildi. Sondaı-aq, jaraqat alǵan 6 balanyń otbasyna qordan 18 mln teńge berildi», - dedi «Qazaqstan halqyna» qoǵamdyq qory basqarma tóraǵasynyń orynbasary Lázzat Shyńǵysbaev elordada ótken baspasóz máslıhatynda.

Onyń aıtýynsha, qor tarapynan qańtar oqıǵasy kezinde zardap shekken jalpy sany 154 adamǵa qarjylaı kómek kórsetildi.

«Osy oraıda, aıtyp ótetin jaıt, qordan kómek alǵan keıbir azamattar olarǵa qatysty málimetterdi jarııalamaýdy surady. Degenmen, bizde kimge qandaı kómek kórsetilgeni týraly tolyq esep bar», - deıdi ol.

Sonymen qatar, «Qazaqstan halqyna» qorynyń basqarma tóraǵasy Bolat Jámishev jýyrda Bas prokýratýradan qańtar oqıǵasynan zardap shekkender men qaza bolǵandar tizimi beriletinin aıtty. Sol tizimdegi azamattarǵa qor tarapynan kómek kórsetilmek.

Buǵan deıin atalǵan qor basshysy Qostanaı oblysynda orman órtinen zardap shekken jandardyń jańa úıine zat alýǵa qoldaý kórsetiletini týraly málim etken edi.