Qańtar oqıǵasynda zardap shekken otbasylarǵa 1,1 mlrd teńge kómek berildi

ASTANA. QazAqparat – Qańtar oqıǵasynda zardap shekken otbasylarǵa 1,1 mlrd teńge materıaldyq kómek berildi. Bul týraly QR Bas prokýratýrasynan málim etti, dep habarlaıdy QazAqparat tilshisi.

«Búginde «Qazaqstan halqyna» qoǵamdyq qory qańtar oqıǵasy kezinde zardap shekken otbasylarǵa 1,1 mlrd teńge somasynda materıaldyq kómek tóledi», - delingen Bas prokýratýranyń QazAqparat saýalyna bergen jaýabynda.

Usynylǵan málimetke sáıkes, qańtar oqıǵasy kezinde 238 adam, onyń ishinde 219 beıbit turǵyn, quqyq qorǵaý organdarynyń 19 qyzmetkeri mert boldy. 16 medıtsına qyzmetkeri, órt sóndirý qyzmetiniń 34, qutqarý qyzmetiniń 8 mamany dene jaraqatyn aldy.

«Azamattar óliminiń jáne dene jaraqatyn alýynyń árbir faktisi qylmystyq istiń tergeý nysany sanalady. Jalpy, sotqa 673 qylmystyq is jiberildi. Olar boıynsha 1 222 tulǵa sottaldy, onyń ishinde 160 tulǵa bas bostandyǵynan aıyryldy», - dep atap ótedi Bas prokýratýradan.