Qańtar oqıǵasynda urlanǵan qarýdyń kóp bóligi tabylmaı jatyr

NUR-SULTAN. QazAqparat – Qańtar oqıǵasynda urlanǵan qarýdyń kóp bóligi tabylmaı jatyr. Bul týraly QR ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Urlanǵan qarýdyń aýqymdy bóligi áli de zańsyz aınalymda. Barlyǵy – 2 113 birlik. Onyń ishinde – azamattyq qarýdyń 1300 birligi men 813 tabeldi qarý. Іshki ister organdary elimizde zańdylyqty jáne quqyq tártibin qamtamasyz etý boıynsha jumysty jalǵastyrýda», - dedi Sanjar Ádilov Ortalyq kommýnıkatsııalar qyzmetindegi brıfıng barysynda.

Onyń atap ótýinshe, qańtar oqıǵasy kezinde zardap shekken azamattarǵa ótemaqy tóleýdi qamtamasyz etý úshin barlyq kúsh jumsalyp jatyr.

«Adal azamattardy qańtar oqıǵalaryna qatysty kez kelgen aqparatty ishki ister organdaryna habarlaýǵa, al qarýdy tapqan jaǵdaıda ony erikti túrde tapsyrýǵa taǵy da shaqyramyz», - dedi ol.