Qańtar oqıǵasynda qaza tapqan qaraǵandylyq sarbazǵa memorıal taqtasy ornatyldy

QARAǴANDY. QazAqparat - Búgin Qaraǵandy qalasynda qańtar oqıǵasynda qaza bolǵan Ulttyq ulan sarbazy Madııar Qaısarovtyń qurmetine memorıal taqtasy ashyldy. Estelik taqta sarbazdyń úıiniń qabyrǵasyna ornatylyp, gúl shoqtary qoıyldy, dep habarlaıdy QazAqparat tilshisi.

«Madııardyń erligi - bárimizge úlgi. Elimizdiń basyna kún týǵan kezde qanshama sarbaz sapta turyp elimizdiń tynyshtyǵy úshin aıanbaı ter tókti. Olardyń ıgi isi jadymyzdan óshpeıdi», - dep atap ótti Qaraǵandy qalasynyń ákimi Ermaǵanbet Bólekpaev.

Saltanatty is-sharaǵa Qaraǵandy qalasynyń ákimdigi, dinı basqarma ókilderi men Ulttyq ulan «Ortalyq» óńirlik qolbasshylyǵynyń áskerı qyzmetshileri keldi.

«Elin qorǵaý jolynda óz janynyń amandyǵyn oılamaı, lańkeske qarsy tótep berip, erjúrek áreketimen qaza bolǵan qarýlas baýyrymyzdyń esimi máńgi ulyqtalady. Óz antyna adal bolǵandarǵa máńgilik taǵzym!», - dep «Ortalyq» óńirlik qolbasshylyǵynyń tárbıe jáne áleýmettik quqyqtyq jumys jónindegi orynbasary, polkovnık Qanat Belıakov.

Іs-shara barysynda sarbazdyń ákesi Orazaly Qaısaruyly sóz alyp, jasalyp jatqan qoldaýǵa rızashylyǵyn bildirdi.

Saltanatty is-shara memorıal aldyna gúl shoqtaryn qoıyp, sap túzegen sarbazdardyń marshymen aıaqtaldy.