Qańtar oqıǵasynda Kárim Másimov pen Samat Ábish jumys ornynda bolǵan - UQK

NUR-SULTAN. QazAqparat – QR Ulttyq qaýipsizdik komıteti tóraǵasynyń orynbasary Asqar Ámirhanov UQK-nyń burynǵy basshysy Kárim Másimovke qatysty isti tergeý barysyna pikir bildirdi, dep habarlaıdy QazAqparat tilshisi.

UQK tóraǵasynyń orynbasary Parlament Májilisinde tilshiler saýalyna jaýap berý barysynda qańtar oqıǵasy kezinde Kárim Másimov pen Samat Ábish jumys ornynda bolǵanyn aıtty.

«Olar qandaı buıryqtar bergenin aıta almaımyn. Qazirgi kezde tergeý barysynda osy buıryqtarǵa egjeı-tegjeıli taldaý júrgizilip jatyr», - dedi Asqar Ámirhanov.

Sonymen qatar tilshiler K. Másimov pen onyń burynǵy orynbasarlaryn qamaýda ustaý merzimi qashanǵa deıin uzartylatynyn surady.

«Bul iske qatysty kúzge qaraı aıqyn bolady dep oılaımyn. Іs materıaldary qupııalanǵan», - dedi ol.

A. Ámirhanov atalǵan iste memlekettik qupııa málimetteri bar ekenin, sottyń ashyq nemese jabyq tártipte ótýin sot organdary sheshetinin atap ótti.

Budan buryn habarlanǵandaı, bıyl maýsym aıynyń basynda QR Ulttyq qaýipsizdik komıtetiniń eks-tóraǵasy Kárim Másimovti qamaýda ustaý merzimi taǵy uzartyldy.

QR Ulttyq qaýipsizdik komıteti tóraǵasynyń orynbasary Asqar Ámirhanovtyń sózine qaraǵanda, tergeý amaldary aıasynda Samat Ábishten jaýap alynyp jatyr.