Qańtar oqıǵasynda ishki ister organdarynyń arnaýly quraldardy qoldanýyna tolyq negiz boldy
«Almatyda qalanyń eki jaǵynan jınalǵan myńdaǵan adam Ortalyq alańǵa bet aldy. Qoǵamdyq jappaı tártipti buzý bastaldy. Zańsyz sherý uıymdastyryldy. Qalada keptelister paıda boldy. Narazylyqqa shyqqandardyń sany artty. Demonstranttar kólikterdi toqtatty. Júrgizýshiler men jolaýshylardy alańǵa barýǵa májbúrledi. Jolda olar armatýramen, taıaqtarmen jáne tastarmen qarýlandy. Polıtsııanyń zańdy talaptaryna baǵynbady. Onymen shektelmeı, zańsyz sherýdi toqtatýǵa jumylǵan Ulttyq ulannyń 250 áskerı qyzmetkerine shabýyl jasady. Olardyń 30-y dene jaraqatyn aldy. Olarǵa kómektesý úshin qosymsha qyzmetkerler men SOBR tartyldy», - dedi Marat Ahmetjanov.
Onyń aıtýynsha, oryn alǵan jaǵdaı eskerile otyryp, polıtsııa qyzmetkerleri men Ulttyq ulannyń áskerı qyzmetshileri adam ólim-jitimine sebepker bolmaıtyn arnaýly quraldarmen jabdyqtalǵan. Shabýyldaýshylarmen qaqtyǵysqan sátte mundaı quraldar qoǵamdyq tártipti qalpyna keltirý úshin qoldanylǵan.
«Bul quraldar «Quqyq qorǵaý qyzmeti týraly» zańǵa saı júzege asyryldy. Ol úshin barlyq negiz boldy: jappaı tártipsizdikter men qoǵamdyq tártipti toptasyp buzý, azamattarǵa, qyzmetkerlerge, ǵımarattarǵa, kólik quraldaryna shabýyldardy toıtarý, ishki ister organdary qyzmetkerleriniń zańdy talaptaryna baǵynbaǵan tulǵalardy ustaý», - dedi mınıstr.
Onyń sózinshe, polıtsııa qoǵamdyq tártipti qalpyna keltirýge tyrysyp, ólimge ákelmeıtin áserli arnaıy quraldaryn ashyq qaqtyǵys mezetinde ǵana qoldandy. Bul halyqaralyq tájirıbege de, eldiń zańdaryna da, atap aıtqanda «Quqyq qorǵaý qyzmeti týraly» zań talaptaryna sáıkes keledi. Bul áreketterdi júzege asyrdyń barlyq sebepteri boldy: jappaı tártipsizdik, azamattar men polıtsııa qyzmetkerlerine jasalǵan shabýylǵa toıtarys berý, qarsylyq kórsetken adamdardy ustaý.
«Tártipsizdikke qatysýshylar polıtseılerge qarsy armatýra, tutandyrǵysh qospasy bar bótelkeler, tas laqtyryp, tártip saqtaý kúshine qarsylyq kórsetti. Almatyda 33 polıtsııa men áskerı qyzmetshi aýyr jaraqat aldy»,-dedi mınıstr.
Foto: Reuters
