Qańtar oqıǵasynda 208 mln teńgeniń qarý-jaraǵyn urlaǵandar sottaldy
Taraz qalasynyń №2 sotynda adamdar tobymen aldyn ala sóz baılasý arqyly qarý men oq-dárilerdi jymqyrý, zańsyz tasymaldaý jáne saqtaý (QR QK 291-b. 3-b. 4-t. 287-b. 2,3,4-, 291-b. 1-b.i, 287-b. 2,3,4-b.) boıynsha 5 adamǵa qatysty qylmystyq is qaraldy.
Anyqtalǵandaı, 2022 jyly qańtar aıynyń 5-inen 6-na qaraǵan túni sottalýshylar I., Á., S., B., M. Taraz qalasynda qıratý, buzý, múlikti joıýmen ulasqan jappaı tártipsizdikterdiń bolyp jatqanyn paıdalanyp, Jambyl oblysy Polıtsııa departamentiniń ǵımaratynan atys qarýlary men oq-dárilerdi jymqyrǵan.
I. Á. S. B. jáne M.-nyń qylmystyq áreketi saldarynan Jambyl oblysynyń Polıtsııa departamentine 208 480 580 teńge materıaldyq zııan keltirilgen.
«Kiná is boıynsha jınalǵan dáleldermen: kýálerdiń aıǵaqtarymen, sot-ballıstıka saraptamasynyń qorytyndysymen jáne zattaı dáleldemelermen dáleldendi», - delingen sot málimetinde.
Sottalýshylar kinálaryn moıyndady.
Jaza taǵaıyndaý kezinde jazany jeńildetetin mán-jaı retinde sottalýshylardyń shyn nıetpen ókinýi, múliktik zalaldyń erikti túrde ótelýi, sotty bolmaǵandary nazarǵa alyndy. Aýyrlatatyn mán-jaı retinde qylmystyń tótenshe jaǵdaı kezinde jasalǵany belgilendi.
«Jasalǵan qylmystardyń sıpaty men qoǵamdyq qaýiptilik dárejesin, sondaı-aq qylmystarǵa árbir qatysýshynyń rólin eskere otyryp, I., B., S.-ǵa 3 jyl 6 aıǵa, Á.-ǵa 3 jylǵa, M.-ǵa 2 jylǵa bas bostandyǵynan aıyrý jazalary taǵaıyndaldy. Úkim zańdy kúshine engen joq», - dedi
Taraz qalasy №2 sotynyń baspasóz qyzmetinen.
