Qańtar oqıǵasynan keıin ustalǵandardy azaptaǵan polıtseıler jaýapqa tartylady - Erlan Qoshanov

NUR-SULTAN. QazAqparat – Azaptaýlarǵa qatysty zańsyz áreket jasaǵan polıtseıler jaýapqa tartylady. Bul týraly Májilis tóraǵasy Erlan Qoshanov málim etti, dep habarlaıdy QazAqparat tilshisi.

Májilistiń jalpy otyrysynan keıin tilshiler palata tóraǵasyna «qańtar oqıǵasynan keıin polıtsııa tarapynan bolǵan azaptaýlarǵa qatysty burynǵy Іshki ister mınıstrin jaýapkershilikke tartý kerek dep sanaısyz ba» degen suraq qoıdy.

«Eger adam qylmystyq iske tartylyp jatsa, azaptaýǵa qatysty kúmán bolsa, ony burynǵy mınıstr Turǵymbaev ózi baryp azaptaǵan joq qoı. Birinshiden, ondaı buıryqty bergen joq. Zańsyz is-áreket jasaǵan polıtseıler bolsa, olar jaýapqa tartylady. Sotta dáleldense, olardyń barlyǵy tıisti jazasyn alady», - dedi E. Qoshanov.

Sonymen qatar Májilis tóraǵasynan qańtar oqıǵasyna qatysty parlamenttik tyńdaý ne sebepti ótkizilmegeni suraldy.

«Qazirgi kezde tergeý amaldary júrip jatyr. Tergeý aıaqtalmaı jatyp biz qandaı parlamenttik tyńdaý ótkize alamyz?», - dedi Erlan Qoshanov.

Eske sala keteıik, aqpan aıynyń sońynda Memleket basshysynyń Jarlyǵymen Erlan Turǵymbaev Qazaqstan Respýblıkasynyń Іshki ister mınıstri laýazymynan bosatyldy.

Keıinnen ol Qazaqstan Respýblıkasy Prezıdentiniń keńesshisi laýazymyna taǵaıyndaldy .