Qańtar oqıǵasynan keıin bılik ókiline baǵynbaý, kúsh qoldaný úshin jaza kúsheıtildi
Májilis otyrysynda «QR keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» Zań jobasy ekinshi oqylymǵa shyǵaryldy.
Zańnama jáne sot-quqyqtyq reforma komıtetiniń múshesi Gúlnar Bıjanova Memleket basshysynyń 11 qańtarda Májiliste bergen naqty tapsyrmalaryn iske asyrý jóninde aıtyp berdi.
«Qańtardaǵy oqıǵalar azamattardyń, onyń ishinde qyzmetkerlerdiń óziniń jáne jaqyn týystarynyń quqyqtary men bostandyqtaryn qorǵaýǵa basymdyq berip, quqyq qorǵaý júıesin reformalaý boıynsha shara qabyldaý qajettigin kórsetti. Osyǵan oraı, depýtattar quqyq qorǵaý blogymen birlesip, kúshtik blok qyzmetkerleriniń quqyqtyq qorǵalýyn, olardyń basshylarynyń jaýapkershilik deńgeıin, áleýmettik qamtamasyz etýdi kúsheıtý, yntalandyrý jáne olar úshin ýájdemeni arttyrý boıynsha birqatar túzetýler ázirledi», - dedi G. Bıjanova Májilistiń jalpy otyrysynda.
Depýtattyń aıtýynsha, bul túzetýlerdi shartty túrde úsh topqa bólýge bolady. Birinshi blok – qyzmetkerlerdiń quqyqtyq qorǵalýyna qatysty bolmaq.
«Atap aıtqanda, Qylmystyq kodekske engiziletin túzetýler arqyly bılik ókiline baǵynbaǵany, oǵan qatysty kúsh qoldanǵany, tótenshe jaǵdaı kezindegi jappaı tártipsizdikter kezinde jáne terrorızmge qarsy operatsııa júrgizý aımaǵynda qyzmetkerdiń ómirine qolsuǵýshylyq úshin jaýaptylyq kúsheıtiledi. Joǵaryda atalǵan jaǵdaılarda qorqytý men kúsh qoldaný úshin de jaýaptylyq artady», - dep túsindirdi depýtat.
Ekinshi blok kúshtik qurylymdardyń sheshim qabyldaýdaǵy derbestigin kúsheıtý jáne olardyń basshylarynyń jaýapkershiligin arttyrý máselelerin sheshedi.
«Biz birqatar zańdarǵa, atap aıtqanda Qylmystyq jáne Qylmystyq-protsestik kodeksterge, «Tótenshe jaǵdaı týraly», «Áskerı jaǵdaı týraly», «Ulttyq ulan týraly» jáne basqa da zańdarǵa ózgerister engizýdi usynamyz. Jańa quramdar úshin qylmystyq jaýapkershilik engiziledi. Mysaly, «Jaýapty memlekettik laýazymdy atqaratyn adamnyń nemese quqyq qorǵaý organynyń nemese arnaýly memlekettik organnyń ózge de basshysynyń qyzmet boıynsha áreketsizdigi». Sanktsııanyń joǵarǵy shegi – 7 jylǵa bas bostandyǵynan aıyrý. Kelesi – «Quqyq qorǵaý organy nemese arnaýly memlekettik organ qyzmetkeriniń qyzmettik mindetterin oryndaýdan bas tartýy nemese jaltarýy» dep atalady. Sanktsııanyń joǵarǵy shegi – 10 jylǵa bas bostandyǵynan aıyrý», - dedi G. Bıjanova.
Sonymen birge, depýtat 452-1-bap – «Bastyqtyń qyzmetindegi áreketsizdik» baby týraly aıtyp berdi.
«Bul bap boıynsha qylmystyq jaýaptylyq tótenshe jaǵdaı kezinde beıbit halyqtyń ómiri men densaýlyǵyna tikeleı qaýip tóngen kezde, ǵımarattardy basyp alý, múlikti joıý, tonaý oryn alǵan kezde, al jergilikti bastyqtar áreket etpeı otyrǵan kezde qarastyrylady. Munyń bárin biz qańtar aıynda baıqadyq. Qoǵamnyń kóńili tolmaǵany sol – keıbir jaýapty basshylar áreket etpeı otyrsa, bireýi jasyrynyp qaldy nemese bireýi tipti qashyp ketti. Ásirese, lańkestikke ulasqan jappaı tártipsizdikter kezinde bul jaýapsyzdyq jáne qylmys», - dedi Gúlnar Bıjanova.
