Qańtar oqıǵasyna tájik azamattary qatysqan joq - Tájikstannyń bas prokýratýrasy
«Qylmystyq-protsessýaldyq zańnamaǵa sáıkes, aldyn ala tergeý protsesinde aıǵaqtar jınalady, oǵan kúdiktiniń jeke basyn, densaýlyǵy (narkologııalyq nemese psıho-nevrologııalyq dıspanserde tirkeýde bolýy), turmystyq jaǵdaıy, turǵylyq mekenjaıy, sıpattamalyq maǵlumattaryn jáne t.b. anyqtaý kiredi.
2023 jylǵy qańtardaǵy jaǵdaı boıynsha Tájikstan Respýblıkasynyń bas prokýratýrasyna Qazaqstan Respýblıkasynyń bas prokýratýrasynan qylmystyq ister boıynsha quqyqtyq kómek kórsetý nemese osy sıpattaǵy kez kelgen aqparat suratylmady.
Osy oraıda, Tájikstan Respýblıkasynyń bas prokýratýrasy Tájikstan Respýblıkasy azamattarynyń Qazaqstandaǵy jappaı tártipsizdikterge qatysqany týraly aqparatty úzildi-kesildi joqqa shyǵarady», - delingen TR bas prokýratýrasynyń baspasóz relızinde.
Aıta ketsek, 5 qańtar kúni Májilis otyrysynda QR Bas prokýrory Berik Asylov Qańtar oqıǵasy kezinde sheteldik azamattar jappaı tártipsizdikke qatysý jáne basqa qylmystar boıynsha kúdikti bolyp tanylǵanyn aıtqan edi. «Onyń ishinde Ózbekstan, Reseı, Qyrǵyzstan jáne Tájikstan azamattary bar», - dedi ol.
Buǵan deıin Qyrǵyzstannyń Syrtqy ister mınıstrligi Berik Asylovtyń málimdemesine jaýap berdi.